Poıyz jolaýshylary OneWeb jáne Starlink ınternetimen qalaı qamtamasyz etiledi
ASTANA. KAZINFORM — Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev temirjol salysyn tsıfrlandyrýǵa qatysty túsinik berdi.
— Mınıstrlik temirjol salasyn tsıfrlandyrýdyń bes baǵytyn iske asyryp jatyr. Birinshisi — memlekettik qyzmetterdi elektrondyq formatqa kóshirý. Ekinshisi — tasymaldardyń ashyqtyǵy men tıimdiligin arttyrý úshin bıznes-protsesterdi reınjınırıngteý. Úshinshisi — ınnovatsııalyq ekojúıe qurý jáne tsıfrlyq tehnologııalardy engizý. Tórtinshisi — jolaýshylardy OneWeb jáne Starlink spýtnıktik ınternetimen qamtamasyz etý. Besinshisi — tranzıttik tasymaldardy onlaın baqylaý júıesin engizý. 2024 jyly salada 5 memlekettik qyzmet qoljetimdi boldy. Olardyń barlyǵy elektrondyq formatta kórsetildi. Bıyl tizilim «Qaýipsizdik sertıfıkatyn berý» atty jańa qyzmet túrimen tolyqtyryldy. Bir jyl ishinde 28 myńnan astam memlekettik qyzmet kórsetildi. Onyń 99%-y onlaın formatta usynylǵan, — dedi J. Mádıev Úkimet otyrysynda.
Onyń aıtýynsha, mınıstrlik salaǵa reınjınırıng júrgizdi. Onyń maqsaty — salany tsıfrlyq túrlendirý jáne tasymaldardyń tıimdiligin arttyrý.
— «Jolaýshylar tasymaly» aktsıonerlik qoǵamy men «Jusan Mobile» aktsıonerlik qoǵamy birlesip, poıyzdardy OneWeb spýtnıktik ınternet tehnologııasy arqyly symsyz
ınternetpen qamtamasyz etýdi synaqtan ótkizýdi aıaqtady. OneWeb spýtnıkterine beıimdelgen mýltımedııalyq qyzmetter jabdyǵy qoldanyldy. Pılottyq joba № ¾ (Astana — Almaty) jáne № 67/68 (Astana — Óskemen) Talgo poıyzdarynda júzege asyryldy. Derekterdi berý jyldamdyǵy — 100 Mbıt/s. Sonymen qatar, Astana — Býrabaı baǵyty boıynsha júretin poıyzda Starlink qoldanylǵan pılottyq joba iske qosyldy. Pılottyq joba aıaqtalǵannan keıin, Mınıstrlik ony masshtabtaý máselesin qarastyrady, — dedi vedomstvo basshysy.
Budan bólek ol mınıstrlik Eýrazııalyq ekonomıkalyq odaq aıasynda tranzıttik tasymaldardy baqylaý júıesin engizip jatqanyn aıtty. Osy maqsatta «Tranzıt» aqparattyq júıesi quryldy. Ol júkterdi naqty ýaqyt rejıminde baqylaýǵa múmkindik beredi.
Eske salsaq, temir salasynda 2035 jylǵa qaraı tranzıttik júk kólemi 100 mln tonnaǵa deıin jetedi.