Poıyz jolaýshylary qandaı zańbuzýshylyqtarǵa jıi barady

ASTANA. KAZINFORM – Keıde poıyzdarda jurttyń beı-bereketin alatyn jolaýshylar kezdesetini ras. Sondaı jaǵdaıda ne isteý kerek jáne buzaqylardyń máselesi qalaı sheshiledi? Bul suraqtyń jaýabyn «Jolaýshylar tasymaly» AQ basqarma tóraǵasy Jánibek Taıjanovtan suraǵan edik.

«Ótken jyldyń qorytyndysy boıynsha shamamen 60 tártip, zań buzýshylyq faktisi tirkeldi. Onyń ishinde vandalızm de bar. Іshimdik iship, tártipke baǵynbaǵan jolaýshylardy poıyzdan túsirgen jaıttar da boldy. Mas kúıinde adamdardyń mazasyn alyp, bereketin qashyrǵan jolaýshylar bolady», - dedi Jánibek Taıjanov vedomstvoda ótken baspasóz máslıhatynda.

Onyń aıtýynsha, jolaýshylardyń qaýipsizdigin qamtamsyz etý maqsatynda Kóliktegi polıtsııa departamentimen birlesip jumys júrgiziledi.

«Bizde arnaıy buıryq bar, onyń negizinde tártip saqshylary ishinara poıyzdardy aralap, jolaýshylardyń tynyshtyǵyn kúzetedi. Másele týyndaǵan jaǵdaıda jolserik aldymen jaıtty poıyz bastyǵyna jetkizedi, sheshilmegen jaǵdaıda tártip buzýshynyń máselesi jaqyn jerde poıyz toqtaǵan stantsııada qaralady», - deıdi ol.