Poıyz jáne ushaq jolaýshylary arasynda qansha qyzylsha deregi tirkeldi

ASTANA. KAZINFORM – Elimizde qyzylshaǵa qatysty epıdemıologııalyq ahýal turaqtalyp keledi. Bul týraly Kóliktegi bas memlekettik sanıtarııalyq dáriger Janar Orazalına aıtty.

«Sońǵy 2 apta ishinde naýqastaný kórsetkishiniń 15,7 paıyzǵa tómendegeni baıqalady. Jaǵdaıdy odan ary jaqsarta túsý úshin ınfektsııanyń taralýyna jol bermeý boıynsha belsendi is-sharalardy jalǵastyrý qajet», - dedi ol agenttik tilshisine bergen suhbatynda. 

Onyń atap ótýinshe, kólik qyzmetkerleri arasynda qyzylshaǵa shaldyqqandar bar. Máselen, osy jyldyń basynan beri Kóliktegi sanıtarlyq-epıdemıologııalyq baqylaý departamentine qarasty nysandardyń qyzmetkerleri arasynda qyzylshanyń zerthana arqyly dáleldengen 40 jaǵdaıy tirkeldi. Onyń ishinde 31 adam temir jol kóligi, al 9 adam áýe kóligi salasynda jumys isteıdi. 

Munan bólek, jolaýshylar arasynda da qyzylshaǵa shaldyqqandar anyqtalyp jatady. Jyl basynan beri temir jol kóligimen saparlaǵan 14 jáne áýe kóligimen saparlanǵan 3 jolaýshydan qyzylsha anyqtaldy. 

«Biz kólik salasynyń barlyq qyzmetkerleri men azamattardy densaýlyǵyna jaýapkershilikpen qarap, ekpe alýǵa, aldyn alý sharalaryn saqtaýǵa, sonymen qatar qoldy únemi jýyp, qoǵamdyq oryndarǵa betperde taǵýǵa, áleýmettik araqashyqtyqty saqtaýǵa shaqyramyz», - dedi Janar Orazalına.