Poıyz qozǵalysyn endi onlaın baqylaýǵa bolady
ASTANA. KAZINFORM – Qazaqstandyq jolaýshylar poıyzdardyń qozǵalysyn naqty ýaqyt rejıminde baqylaýǵa múmkindik aldy.
«Jolaýshylar tasymaly» AQ málimetinshe, vokzalǵa barmas buryn jolaýshylar poıyzdyń qaı jerde kele jatqanyn aldyn ala teksere alady. Ol úshin tablo-railways.kz saıtynda «Poıyzdar qozǵalysynyń onlaın-tablosy» servısi iske qosylǵan.
Qyzmet arqyly kartadan poıyzdyń naqty ornyn kórýge, kelý jáne ketý ýaqytyn tekserýge, marshrýt boıyndaǵy stantsııalardyń tizimin, aıaldaý uzaqtyǵyn jáne sońǵy stantsııaǵa jetýdiń boljamdy ýaqytyn anyqtaýǵa bolady.
Onlaın-tablo ásirese jolaýshylar aǵyny joǵary kezeńderde ózekti. Bul jolaýshylarǵa vokzalǵa shyǵý ýaqytyn dál josparlaýǵa, artyq kútýden aýlaq bolýǵa jáne saparyn yńǵaıly uıymdastyrýǵa múmkindik beredi.
– Jolaýshylarǵa poıyz qozǵalysyn aldyn ala tekserip otyrý usynylady. Bul ásirese sapar basqa kólikke aýysýmen jalǵasatyn, vokzaldan jolaýshy kútip alatyn nemese ári qaraıǵy baǵyt aldyn ala josparlanǵan jaǵdaıda mańyzdy, – delingen habarlamada.
Servısti paıdalaný úshin tablo-railways.kz saıtyna kirip, kartadan qajetti poıyzdy tańdaý jetkilikti. Sondaı-aq onlaın-tabloǵa bilet.railways.kz resmı saıty arqyly da ótýge bolady.
Qyzmet jolaýshylar poıyzdaryna ornatylǵan GPS-trekerlerdiń derekteri negizinde jumys isteıdi. Aqparat avtomatty túrde «Jolaýshylar tasymaly» AQ Ahýaldyq ortalyǵyna jiberilip, quramdardyń qozǵalysy táýlik boıy baqylanady.
Aıta keteıik, Qazaqstanda poıyzben bagaj tasymaly tsıfrlyq formatqa kóshedi.
