Power Central Asia + China: birqatar kommertsııalyq kelisimge qol qoıylady

ASTANA. KAZINFORM — Energetıka mınıstri Erlan Aqkenjenov Power Central Asia + China alǵashqy óńirlik energetıkalyq forýmy aıasynda qandaı qandaı kommertsııalyq qujattarǵa qol qoıylatynyn aıtty. 

— Biz sýtegi energetıkasyn damytý salasynan úlken úmit kútemiz. Energetıka mınıstrligi sýtegi salasyn damytýdyń Tujyrymdamasyn qabyldady, oǵan kelesi baǵyttar kiredi: óndirý, tasymaldaý jáne saqtaý, elektr energııasyna aınaldyrý, — dedi ol.

Sondaı-aq mınıstr eksportqa baǵyttalǵan jáne tehnologııalar tartýdy kózdeıtin pılottyq jobalar ázirlenip jatqanyn aıtty. Odan bólek forým aıasynda qandaı kommertsııalyq qujattarǵa qol qoıylatynyn atap ótti.

Olar mynalar:

— China Energy Overseas Investment kompanııasy men «JEK-ti qoldaý jónindegi qarjy-esep aıyrysý ortalyǵy» JShS arasynda Túrkistan oblysyndaǵy «Saýran» kún elektr stantsııasy jobasy boıynsha elektr energııasyn satyp alý-satý sharty;

— Qazaqstan Respýblıkasynyń Energetıka mınıstrligi men China Southern Power Grid arasyndaǵy yntymaqtastyq týraly memorandým;

— Qazaqstan Respýblıkasynyń Energetıka mınıstrligi men Power Construction Corporation of China, ltd. (Powerchina) arasynda (strategııalyq) yntymaqtastyq týraly negizdemelik kelisim.

— Sondaı-aq, biz «Bir beldeý — bir jol» bastamasy aıasynda energetıka salasyndaǵy ónerkásiptik bazany qalyptastyrý jáne eksporttyq tizbekterdi keńeıtý boıynsha Qytaıdyń negizgi seriktesterimen jumys júrgizip jatyrmyz, — dep túıdi sózin vedomstvo basshysy. 

Aıta ketelik Qazaqstan men Qytaı 25 mlrd dollarǵa 60 kelisimge qol qoıdy.