«Postshyndyq dáýiri» memleketterge jańa múmkindikpen birge qater de usynyp otyr – Aqparat mınıstri
«24 saǵattyq jańalyqtar tsıkli men áleýmettik jeliler jańa kezeńniń – postshyndyq dáýiriniń paıda bolýyna áser etti. Bul dáýirde qoǵamdyq pikir obektıvti faktiler emes, adamdardyń emotsııasy men sýbektıvti senimderine júginý negizinde qalyptasady. Sondyqtan ol memleketterge, úlken korporatsııalar men medıakompanııalarǵa jańa múmkindiktermen birge jańa qaterler de usynyp otyr. Qolyna smartfon ustaǵan kez kelgen adam aqparat taratýshyǵa aınalǵan. Sondyqtan jeli keıde jelikpeniń sózine kórik basqan mundaı kezeńde talǵamsyz taraǵan habardy eleıtin elek bolmaǵandyqtan, shyn men jalǵannyń, ras sóz ben jalanyń, ósek pen ótiriktiń aralasyp ketetini belgili», - dedi mınıstr.
Sondaı-aq, ol tekserilmegen aqparatty jıi tutynýdyń keri áseri týraly paıymyn aıtty.
«Tekserilmegen sýret, anyqtalmaǵan, salystyryp, sarapqa salynbaǵan senimge selkeý túsiretin jalǵan aqparat, derek-dáıegi joq dabyl jurtty shatastyrady. Rastalmaǵan, derekkózderge silteme jasalmaǵan, emotsııaǵa toly vıdeo, sýrettermen qosa berilgen keıde bireýdiń aryna tıetin, jeke basqa, iri kompanııaǵa jala jabylǵan aldamshy aqparattar adamdy adastyrady. Muny ádeıi jasaǵan, taratqan ıakı bilmestikten bólisken jandar kóbine zań buzǵanyn, adamnyń quqyna qol suqqanyn da sezine bermeıdi. Bul degenimiz – postshyndyq, shyndyq sózdiń ornyna jeldeı esken jyldam aqparat, jańalyq pen jalǵandyqtyń aıyrmashylyǵy tym qysqarýyna ákep soqty», - dedi vedomstvo basshysy.
