Postkeńestik memleketter damýynyń kóshpeli kezeńi aıaqtaldy - D.Nazarbaeva
ASTANA. QazAqparat - Postkeńestik memleketter damýynyń kóshpeli kezeńi aıaqtaldy. Bul týraly búgin elordadaǵy Táýelsizdik saraıynda ótip jatqan 12-shi Eýrazııalyq medıa forým barysynda QR Parlamenti Májilisiniń vıtse-spıkeri, atalǵan forýmnyń uıymdastyrý komıtetiniń tóraıymy Darıǵa Nazarbaeva aıtty.
«Ydyraǵan Keńes odaǵynyń ornynda paıda bolǵan, ıaǵnı, postkeńestik dep atalatyn memleketterdiń ekonomıkalyq, áleýmettik, saıası damýynyń saraptamasy bizdiń elderimizdiń kóshpeli kezeńdi aıaqtaǵanyn kórsetip otyr», - dedi ol.
D.Nazarbaevanyń atap ótýinshe, búgingi tańda eýrazııalyq keńistiktegi elderdiń damý qarqynynyń alýandyǵy máselesi ótkir kóterilip otyr. «Al damýdyń sınhrondylyǵy bizdiń elderimiz taıaý onjyldyq ishinde sheshýi qajetti mańyzdy problemalardyń biri», - dedi Májilis vıtse-spıkeri.
Sonymen qatar ol óz sózinde eki kúndik forým aıasynda uıymdastyrylatyn otyrystarǵa jeke-jeke toqtalyp, qandaı máseleler kóteriletindigin tarqata aıtyp berdi.
