Postkeńestik keńistiktegi memleketterdiń ishinde adam quqyqtaryna qatysty jaǵdaı Qazaqstanda ǵana kóńil toltyrarlyqtaı - E. Erimbet
ASTANA. Sáýirdiń 7-si. QazAqparat /Aıdar Ospanalıev/ - Postkeńestik keńistiktegi memleketterdiń ishinde adam quqyqtaryna qatysty jaǵdaı Qazaqstanda ǵana kóńil toltyrarlyqtaı.
Bul týraly búgin buqaralyq aqparat quraldarynyń ókilderimen eldegi qylmystyq-atqarý júıesiniń qyzmetine baılanysty baspasóz máslıhatyn ótkizgen Ádilet mınıstrliginiń resmı ókili Erbolat Erimbet málim etti, dep habarlaıdy QazAqparat.
Onyń sózine qaraǵanda, aǵymdaǵy jyldyń naýryz aıynda Birikken Ulttar Uıymynyń Adam quqyqtary jónindegi arnaıy keńesiniń 13-shi sessııasynda azaptaýlarǵa jáne basqa da qatygez, adamgershilikke jatpaıtyn jáne ar-namysty qorlaıtyn is-áreketter men jazalaý túrleri máseleleri jónindegi arnaıy baıandamashysy Manfred Novaktyń Qazaqstanda bolǵan saparynyń qorytyndysy jarııalanǵan.
«Baıandamashy óziniń qorytyndysynda elde azaptaý áreketteriniń aldyn alý men onymen kúreske qatysty máselelerdi sheshýde aıtarlyqtaı ilgeri qadamdar jasalǵandyǵyn aıtty. Novak myrza qylmystyq jazasyn óteý oryndaryndaǵy jaǵdaı atalmysh mekemeler Ádilet mınıstrligine berilgen 2002 jyldan bastap, birshama jetilip qalǵandyǵyn óz kózimen kórip qaıtty», dedi resmı ókil.
Ol keltirgen málimetterge qaraǵanda, búginde elde 75 túzeý mekemeleri, 19 tergeý oqshaýlaǵyshy, 218 qylmystyq atqarý ınspektsııasy, 21 fılıaly bar 3 «Eńbek» respýblıkalyq, memlekettik kásiporyny jáne bas bostandyǵynan aıyrý oryndarynda otyrǵan azamattardy beıimdeýge baǵyttalǵan 2 ortalyq bar. Sáýir aıynyń 5-ine deıingi málimetter boıynsha onda 62 myń 164 sottalǵandar men kúdikti retinde qamaýǵa alynǵandar bolǵan. «Qylmystyq atqarý júıesiniń ókilderi bas bostandyǵynan aıyrý oryndarynda qylmystar men quqyqbuzýshylyqtardyń aldyn alý baǵytyndaǵy jumystardy júıeli túrde júzege asyryp otyrady. Mysaly aǵymdaǵy jyldyń naýryz aıynyń 20-sy men 26-sy aralyǵynda «Qadaǵalaý» respýblıkalyq sharasy júrgizilip, onyń barysynda 280 qamaýda ustaý tártibin buzý áreketi anyqtaldy. Sondaı-aq túrmelerge jiberilý qajet 233 myń 600 teńge men 345,7 lıtr spırt, 2 myń 259 gramm esirtkilik zattar jáne 193 uıaly baılanys quraldary tárkilendi», dedi E.Erimbet.
