Postkeńestik elderdiń memlekettik basqarýyndaǵy kóshbasshylyqty 20 eldiń sarapshylary talqylady
Sessııaǵa 20 álemniń elinen memlekettik basqarý salasynyń ǵalymdary, sarapshylary men praktıkteri qatysty.
Paneldik sessııanyń ashylý rásiminde Basqarýshy komıtettiń tóraǵasy Álıhan Baımenov: «Basqarý júıeleri búkil álemde jańa jaǵdaılarǵa belsendi túrde beıimdelýde, bul tek zamanaýı tehnologııalar qoldanýǵa qatysty aıtylyp otyrǵan joq. Qundylyqtar, korporatıvtik mádenıet jáne kóshbasshylyq mańyzy odan saıyn arta túsýde», - dedi.
Ol, sondaı-aq, aımaqtaǵy árbir eldiń memlekettik basqarýy ózindik tarıhı, mádenı, geosaıası jáne áleýmettik-ekonomıkalyq faktorlar áserinen qalyptasqanyna toqtaldy. Al bastapqyda uqsas pozıtsııada bolǵan nemese tarıhı damýy ortaq eldermen júrip ótken joldy birge saralaý, «kelise otyryp, ton pishý» mańyzdy ekenin atap ótti.
ASPA atqarýshy dırektory Ýılıam Shılds Hab pen ASPA arasyndaǵy ózara túsinistik týraly memorandýmǵa qol qoıylǵanyna 5 jyl tolǵandyǵymen quttyqtady. «Hab memlekettik basqarý salasynda tájirıbe men bilim almasý boıynsha memleketterge qoldaý kórsetý mıssııasyn tabysty iske asyrýda jáne osy turǵyda ASPA-men kúshti ári aıryqsha bir týystyq baılanys seziledi» dedi.
QR Prezıdenti ákimshiligi basshysynyń orynbasary Tımýr Sýleımenov qazirgi kezde halyqtyń úkimetke degen senimi úlken qysymǵa ushyrap otyrǵanyn aıtty. Osyǵan oraı pandemııamen kúreste, kásiporyndardy qoldaýda, sondaı-aq halyqty áleýmettik qorǵaýda memlekettik basqarý men memlekettik qyzmettiń atqaratyn róliniń asa zor ekendigin aıtty.
Ekonomıkalyq yntymaqtastyq jáne damý uıymynyń (EYDU) Memlekettik basqarý dırektoraty basshysy Elza Pılıchovskı memlekettik sektor úshin, onyń ishinde onyń basshylaryna kúrdeli qoǵamdyq máselelerdi sheshe alatyndaı jahandyq quzyretterdi damytýdyń mańyzdylyǵyna toqtaldy. Ol sondaı-aq Habqa yntymaqtastyqty nyǵaıtqany jáne EYDU elderi men aımaq arasynda tájirıbe almasýǵa kómekteskeni úshin alǵysyn bildirdi.
Ázerbaıjan, Grýzııa, Qazaqstan, Latvııa, Lıtva jáne Ýkraına úkimetteriniń ókilderi men sarapshylary memlekettik basqarý salasyndaǵy óz tájirıbelerimen bólisti. Olar basqa faktorlarmen qatar ósý, daǵdarys nemese belgisizdik kezeńinde basqalarǵa yqpal etip, olardy is-áreketke jigerlendirý, alysty mejelep, ıkemdi áreket etý kóshbasshylyq úshin sheshýshi ról atqaratynyn atap ótti.
Pikirtalasqa memlekettik qyzmetshilerdi yntalandyrý teorııasynyń negizin qalaýshy professor Djeıms L.Perrı, ASPA-nyń burynǵy prezıdenti doktor Stıven Kondrı, Vırjınııa dostastyq ýnıversıtetiniń professory Saltanat Lıbert jáne Belgııa federaldy memlekettik qyzmeti departamentiniń (BOSA) basshysy Pıter Vandenbrýaıene sııaqty belgili ǵalymdar men memlekettik basqarý salasyndaǵy sarapshylar qatysty. Olar tájirıbelerine súıene otyryp, memlekettik basqarýdaǵy kóshbasshylyqtyń ádisteri, stıli men qundylyqtaryna qatysty oılary jáne usynystarymen bólisti.
Sessııa barysynda mamandar men ǵalymdar kóshbasshylyqtyń basqa da ózekti aspektileri týraly pikir almasty. Sondaı-aq, Hab aýqymynda Palgrave Macmillan baspasynan postkeńestiktik 15 elde sońǵy 30 jyl ishinde memlekettik basqarýdyń damýy taldanatyn kitap baspaǵa daıyndalyp jatqandyǵy málim boldy.
