Poshtashynyń jalaqysy respýblıkalyq ortasha deńgeıden 58,1 paıyzǵa tómen

Bul týraly búgin Májilistiń Áleýmettik-mádenı damý komıtetiniń keńeıtilgen otyrysynda málim boldy. Komıtet tóraıymy Darıǵa Nazarbaevanyń jetekshiligimen ótken jıynda «Qazposhta» AQ búgingi jaǵdaıy men bolashaǵy talqylanǵan bolatyn.

«Qazposhta» AQ tóraǵasy Ashat Bısenbaevtyń aıtýynsha, kompanııanyń jıyntyq quramyndaǵy personaldar sany 22 myńnan asady. «Shtattyq keste tómen jáne aýyldyq eldi mekenderge qyzmet kórsetýge bizdiń jumysshylarymyzdyń 50 paıyzy tartylǵan. Jalpy, aýyldyq jerlerde qyzmet kórsetý aýqymy bizdiń poshtashylarymyzdyń tolyq stavkasyn aqtamaıtyndyqtan, ondaı mólsher keıbir óńirlerde 0,1 stavkaǵa deıin bólinedi, al bul 4 myń teńgelik ortasha aılyq bazalyq jalaqyǵa tıesili bolyp otyr. Degenmen, buny jalaqy dep emes, qosymsha aqy degen jón», - deıdi A. Bısenbaev.

Onyń sózine qaraǵanda, aýyldyq eldi mekenderdegi eńbekaqy shyǵystary 4,4 mlrd. teńgeni quraıdy. Al áleýmettik problemalar arasynda kadr turaqsyzdyǵy ulǵaıyp, 23 paıyzǵa jetken. Bul da jalaqynyń tómendigine baılanysty.

«Bul rette jalaqynyń tómen kórsetkishi qyzmet kórsetý sapasynyń tómendigine de, operatordyń quzyrettiligine de áser etetini belgili. Budan bólek, keıbir aýyldardyń damý áleýetiniń tómendigi olarǵa kórsetiletin qyzmet tıimdiligine keri áser etedi. Sondyqtan da, bizdiń kompanııanyń aýyldaǵy qyzmetin jaqsartyp, ońtaılandyrý máselesi ózekti», - deıdi Ashat Bısenbaev.

Jalpy, «Qazposhta» AQ óndiristik personal qyzmetkerleriniń jalaqysyn byltyr 12 paıyzǵa, 2014 jyldyń qańtarynan qosymsha 7 paıyzǵa arttyrǵan. Alaıda, bul sharanyń ózi kompanııa qyzmetkerleriniń jalaqysyn respýblıkalyq ortasha jalaqy deńgeıine jaqyndatý máselesin sheshe almaı otyr. Máselen, 2013 jyly poshtashynyń ortasha jalaqysynyń deńgeıi 45 609 teńgeni quraǵan, bul respýblıka boıynsha ortasha jalaqy deńgeıinen 58,1 paıyzǵa tómen.