Poshtaǵa kelgen kúdikti xattardy ashpańyzdar - UQK

  ASTANA. QazAqparat - QR Ulttyq qaýipsizdik komıteti xakerlerdiń fıshıng shabýyldary týraly aıtyp berdi, dep xabarlaıdy QazAqparat tilshisi.

Aqparattyq qaýipsizdik departamentiniń dırektory Sergeı Jýravlevtiń aıtýynsha, elektrondy poshtaǵa túsetin xattardy muqııat qarap otyrý qajet. Sebebi ishinde xakerler jibergen xattar bolýy ábden múmkin. Ondaı xattar ashylsa, arnaıy vırýs adamnyń barlyq málimetterin «jınap alady». Sol arqyly bank esep-shottaryna kirip, aqshany da urlap ketýge múmkindik bar. 

«Máselen, vırýsty xattardy jappaı taratady. Ol kezde alaıaqtar adamdardyń saýatsyzdyǵyna senip otyrady. Sebebi bilmeıtin adam xatty asha salady. Sosyn maqsatty fıshıng shabýyl bolady. Ondaıda aldymen adamnyń psıxologııalyq bet-beınesin zertteıdi. Onyń áleýmettik jelileri zertteledi. Naqty qandaı ispen aınalysatyny jáne nemen áýesteneni qaralady da, xattyń mazmuny soǵan saı jazylady. Bundaı xattardyń 80 protsenti ashylady. Sóıtip, kompıýterge arnaıy vırýs taralady da, adamnyń barlyq xat almasýlaryn baqylap otyrýǵa bolady», - dedi S.Jýravlev jýrnalısterge bergen suxbatynda.

Mamannyń sózine qaraǵanda, messendjerler arqyly keletin xattardan da abaı bolǵan jón.

«Birinshiden, belgisiz bireýden kelgen xabarlamalarǵa jaýap bermeńizder. Ekinshiden, jelide otyrǵanda tek dostaryńyzǵa ǵana senińizder. Úshinshiden, memlekettiń kómeginen qoryqpańyzdar. Biz kıbershabýyldarǵa qarsy tura alamyz», - dep atap kórsetti S.Jýravlev.

Aıta keteıik, elimizde kıberqaýipsizdik salasyndaǵy maman tapshylyǵy máselesi ózekti bolyp tur. Osy salada jalaqynyń mólsheri 1500 - 3000 dollarǵa deıin barady. Alaıda kásibı mamandar az.

Aldaǵy ýaqytta «Qazaqstannyń kıberqalqany» tujyrymdamasy aıasynda jańa akademııany ashý josparlanyp otyr.

Al QR UQK Shekara qyzmetinde aqparattyq qaýipsizdik batalony qurylady.

Búginde xakerler zeınetkerlerdiń aqshasyn urlaı bastady.