Poshta jetkizý tártibi ózgeredi - Májilis
ASTANA. KAZINFORM — Búgin Májilistiń jalpy otyrysynda «Poshta týraly» Zańyna ózgerister men tolyqtyrýlar engizý týraly» zań jobasy birinshi oqylymda maquldandy.
Bul qujat Parlament Májilisi depýtattarynyń bastamasymen ázirlendi. Olardyń qatarynda depýtat Ekaterına Smyshlıaeva da bar.
- Poshta operatorlarynyń qyzmeti el úshin úlken strategııalyq mańyzy bar. Sondyqtan búgingi tańda poshta salasy transformatsııadan ótip jatyr. Alaıda qazirgi kezde qaǵaz hattardy, merzimdi basylymdardy jetkizý qyzmetteri azaıyp keledi. Osy jaǵdaıda poshta baılanysynyń logıstıkalyq ınfraqurylymyn joǵaltpaý jáne damýdyń ońtaıly joldaryn tabý mańyzdy. Sondyqtan zań jobasy aıasynda jetkizý tártibi ózgeredi. Tsıfrlyq tehnologııalardyń arqasynda tıisti pın-kod nemese QR-kod bolǵan kezde úshinshi tulǵalardyń poshtany qabyldap alý múmkindigin beredi. Sonymen qatar bul taýardy marketpleısterden poshta bólimshesine jáne úıge jetkizýdi jeńildetedi, - dedi Májilis depýtaty E. Smyshlıaeva.
Munymen qosa, zań jobasynda jobada sálemdemelerdi qabyldaý úshin poshtamattardy ornalastyrý jáne paıdalaný tártibi eskerilgen. Bul norma olardy kondomınıým nysandarynda ornalastyrý úshin qajet.
- Budan bólek, qazir talap etilmegen keıbir ámbebap qyzmetter alynyp tastalady. Mysaly, poshta kartalaryn nemese banderolderdi jiberý.
Sondaı-aq talap etilmegen korrespondentsııany saqtaý merzimi qysqarady, - dedi ol.
Onyń aıtýynsha, poshta ınfraqurylymy boıynsha eskirgen normalar alynyp tastalady. Birqatar normalar poshta baılanysy naryǵyn damytýǵa jáne osy saladaǵy retteýshiniń ókilettikterin naqtylaýǵa baǵyttalǵan.
Búgin Májilistiń jalpy otyrysynda depýtat Juldyz Súleımenova poshta salasynda tsıfrlyq tehnologııalardyń qaýipsizdigine qatysty suraq qoıdy.
- Zań jobasynda QR-kod nemese SMS arqyly poshtany alý tetikteri qarastyrylyp otyr. Jalpy, osy jańa tetikterdi engizgennen keıin, azamattardyń jeke derekteri taralyp ketpeı me? Sonymen qatar alaıaqtar úshin bul jańa tásil bolmaı ma? - dep surady J.Súleımenova.
Óz kezeginde Ekaterına Smyshlıaeva osy táýekelder Májilistegi jumys tobynyń otyrysynda talqylanǵanyn aıtty.
- Engizilip otyrǵan tetikter aıtarlyqtaı jan-jaqty pysyqtalǵan. QR-kod jáne SMS-ti paıdalaný kezinde bul is-qımyldar paıdalanýshynyń arnaıy qosymshadaǵy tek «jeke kabınetinde» júzege asyrylady. Sondyqtan bul salada qater bolmaıdy, - dep túsindirdi E.Smyshlıaeva.