«Poshta týraly» jańa zań qabyldandy - Senat
ASTANA. QazAqparat - Búgin QR Parlamenti Senatynyń jalpy otyrysynda «Poshta týraly» QR Zańy qabyldandy. Qujat endi Memleket basshysynyń qol qoıýyna joldanady.
Atalǵan qujat poshta salasyn uıymdastyrýdyń qazirgi zamanǵy halyqaralyq standarttaryna saı keletin tıimdi júıesin zańnamalyq turǵydan engizý jolymen odan ári damytýdy qamtamasyz etedi.
Budan bólek, poshta salasyndaǵy qyzmet pen poshta baılanysynyń kórsetiletin qyzmetteriniń túrleri naqtylanyp, keńeıtiledi.
Máselen, bul rette poshta baılanysynyń qoldanystaǵy júıesinen bólek qarjylyq qyzmetter, banktik operatsııalar, kólikpen kórsetiletin qyzmet pen agenttik qyzmetteri qamtylyp otyr.
«Qazaqstandaǵy poshta naryǵy búgingi kúni qalalyq deńgeıde ǵana básekelestik baıqalady. Sońǵy aqparat boıynsha elimizde 114 poshta operatorlary qyzmet kórsetse, aýyldyq jerlerde tek Ulttyq operator ǵana qyzmet atqaryp keledi. Qoldanystaǵy zańnamalyq baza aqparattyq ǵasyrdyń talaptaryna saı kelmeı otyr. Sondyqtan da, poshta salasyn jańǵyrtý qajettigi týyndady», - dedi Investtsııalar jáne damý vıtse mınıstri Jeńis Qasymbek.
Onyń aıtýynsha, jańa zań poshta salasyndaǵy qyzmettiń sapasyn arttyryp, bul saladaǵy qaýipsizdik sharalaryn kúsheıtýdi qarastyrady. Budan bólek, Ulybrıtanııanyń ozyq tájirıbesiniń negizinde jańa poshtalyq ındeksterdi engizý josparlanady.
Jańa poshtalyq ındekster tek poshta operatorlarynyń óndiristik nysandaryna ǵana emes, sonymen qatar barlyq turǵyn úı jáne turǵyn emes ǵımarattarǵa beriletin bolady. Bul paıdalanýshylardyń meken jaılaryn naqty anyqtaýǵa jáne jazbasha hat-habarlardy suryptaýdy tezdetýge múmkindik beredi.
«Budan bólek, zań jobasynda gıbrıdtik jóneltilim qyzmetin kórsetýdiń negizgi erejeleri bekitiledi. Bul qaǵaz júzindegi qarapaıym poshta jóneltiliminiń keıbir kezeńderden ótpeı-aq, gıbrıdtik jóneltilimdi adresatqa tez arada jetkizýge múmkindik beredi. Qazirgi ýaqytta osy tásildi QR Joǵarǵy soty «Qazposhta» AQ-men birlesip atqarýda. ıAǵnı, poshta bólimsheleri sot habarlamasyn eldiń shalǵaı aýdandaryna dereý jetkizýdi qamtamasyz etip otyr», - deıdi J. Qasymbek.
