Poshta salasyndaǵy qaýipsizdikti qamtamasyz etý sharalary kúsheıtiledi - S.Sársenov
ASTANA. QazAqparat - Poshta salasyndaǵy qaýipsizdikti qamtamasyz etý sharalary kúsheıtiledi. Bul týraly búgin Parlament Májilisinde «Poshta týraly» zań jobasyn tanystyrǵan Investıtsııalar jáne damý vıtse-mınıstri Sáken Sársenov málim etti.
Vıtse-mınıstrdiń aıtýynsha, poshta salasynyń qoldanystaǵy zańnamalyq bazasy aqparattyq qoǵamnyń damýyna qaraı jańǵyrtýdy qajet etedi. «Máselen, «Poshta týraly» QR Zańy 2003 jyly kúshine engen bolatyn jáne sol ýaqyttan beri 12 jyl ótti. Osy ýaqyt aralyǵynda poshta baılanysy qyzmetterin kórsetýdiń tehnologııasynda ózgerister paıda boldy, halyq tarapynan elektrondyq kommertsııa, elektrondyq qyzmetter jáne t.b. sııaqty keıbir poshtalyq qyzmetterge suranystary artýda. Budan basqa, poshta salasyndaǵy qoldanystaǵy zańnamada keıbir kemshilikter bar», - deıdi S.Sársenov. Onyń aıtýyna qaraǵanda, zań jobasynyń negizgi maqsaty qoldanystaǵy zańnamadaǵy kemshilikterdi joıý, poshta operatorlarynyń áreketin zamanaýı talaptarǵa jáne halyqaralyq standarttarǵa sáıkes keletin quqyqtyq negizben qamtamasyz etý, poshta baılanysy qyzmetin kórsetýdiń sapasyn arttyrý jáne onyń tıimdiligin qamtamasyz etý bolyp tabylady. Budan bólek, poshta salasyndaǵy qaýipsizdikti qamtamasyz etý boıynsha sharalar kúsheıtiledi. «Aýyldyq eldi mekenderde aqsha qarajattaryn urlaý jáne jymqyrýdy boldyrmaý boıynsha sharalar qabyldanatyn bolady», - dedi vıtse-mınıstr. Tutastaı alǵanda, qazirgi ýaqytta Qazaqstanda poshta qyzmetteriniń jelisi damýdyń jańa sapaly deńgeıine ótý satysynda bolyp tabylady. Al byltyrǵy jyldyń qorytyndysy boıynsha poshta operatorlarynyń 2014 jylda kórsetilgen qyzmetterden túsken jalpy tabys jazbasha hat-habardan 10,7 mlrd. teńge, sálem-saýqattardan 12,5 mlrd. teńge, qarjylyq qyzmetterinen 13,2 mlrd. teńgeni quraǵan. Mamandar jyl saıyn jazbasha hat-habar kóleminiń azaıýyn alǵa tartady.
