Poshta salasy qyzmetine Ulybrıtanııanyń ozyq tájirıbesi engiziledi
ASTANA. QazAqparat - «Poshta týraly» jańa zań jobasynda poshtany paıdalanýshylar men qyzmetkerlerdiń qaýipsizdiin qamtamasyz etý sharalary qarastyrylyp otyr. Bul týraly búgin Parlament Senatynda ótken dóńgelek ústelde «Qazposhta» AQ Basqarma tóraǵasy Baǵdat Mýsın málim etti.
Tóraǵanyń aıtýynsha, zań jobasynyń basty maqsaty - qoldanystaǵy zańnamanyń olqylyqtaryn joıý, poshta operatorlary qyzmetiniń quqyqtyq negizin qamtamasyz etý bolyp tabylady. Sonymen qatar, jańa qujat arqyly poshta qyzmetin zamanaýı halyqaralyq talaptarǵa sáıkestendirý de kózdelgen. Buǵan baılanysty poshta baılanysy qyzmetiniń tıimdiligin arttyryp, sapasyn kóterý, poshta salasyndaǵy qaýipsizdik sharalaryn nyǵaıtý qarastyrylady.
Budan bólek, «Qazposhta» basshysynyń aıtýyna qaraǵanda, jańa zań jobasynda «gıbrıdti jóneltilimderdi jetkizý» termıni qarastyrylyp otyr. Bul jedeldetilgen tártippen poshtalardy adresatqa jetkizýdi qamtamasyz etedi.
«Qazirgi tańda Joǵarǵy Sot pen «Qazposhta» AQ birlese osyndaı júıemen jumys jasaýda. Ol boıynsha sot shaqyrtýlary nemese habarlamalary elimizdiń belgili bir óńirlerine lezde jetkiziledi. Budan basqa, Ulybrıtanııanyń ozyq tájirıbesi negizinde jańa poshtalyq ındekster engizý josparlanady. Ondaı tetik poshta operatorlarynyń óndiristik obektilerine ǵana emes, elimizdiń turǵyn úı nemese turǵyn úı emes ǵımarattaryna da engiziledi. Bul paıdalanýshylar mekenjaıyn naqty anyqtap, hattardy suryptaý úderisin jeńildetedi», - deıdi Baǵdat Mýsın.
