Poshta qyzmetinde bolashaqta serpindi ózgerister bolýy múmkin - Baılanys jáne aqparat vıtse-mınıstri
ASTANA. 28 jeltoqsan. QazAqparat /Aıdar Ospanalıev/ - «Elimizdiń poshta qyzmetinde serpindi ózgerister bolýy múmkin»,- deıdi Baılanys jáne aqparat mınıstriniń orynbasary Sáken Sársenov. Bul týraly ol búgin Bnews.kz portaly arqyly Qazaqstan Respýblıkasyndaǵy 2010-2014 jyldarǵa arnalǵan aqparattyq - kommýnıkatsııalyq tehnologııalardy damtýdyń basym baǵyttaryna baılanysty ótken on-laın konferentsııa barysynda málim etti.
Onyń paıymdaýynsha, poshta qyzmeti búginde tek baspasóz basylymdaryn taratatyn nemese belgili bir aımaqpen baılanysqa shaǵý úshin paıdalanylatyn mekeme bolýdan qaldy. Poshtany qazir negizinen ınternetti damytýǵa yqpal etetin mekemelerdiń biri deýge bolady. Poshtany belgili bir taýardy belgili bir núktege jetkizip beretin logıstıka quraly retinde de qarastyrýǵa bolady. «Bul «Qazposhta» ulttyq operatorynyń bolashaqta atqarýy tıis basty mindetterdiń biri bolady. Osyǵan baılanysty aldaǵy jyldary bul salada da úlken jańalyqtar bolady degen oıdamyn», - dedi vıtse-mınıstr.
Sondaı-aq ol sózinde elimizdegi barlyq memlekettik organdar men ulttyq kompanııalarǵa otandyq kompıýterlerdi satyp alýdy usynyp otyrǵandyǵyn jetkizdi. «Búginde rynokta otandyq ónim óndirýshiler shyǵarǵan kompıýterler bar jáne olar batystyq úlgidegi kompıýterlerden áldeqaıda arzan. Naqtyraq aıtqanda 70 myń men 100 myń teńgeniń arasynda jaqsy kompıýter satyp alýǵa bolady. Al aqparattyq júıelerge keletin bolsaq, bul baǵytta da biz otandyq ónimderdi satyp alýǵa usynys jasap otyrmyz. Búginde elimizde kez-kelgen júıeni jasap bere alatyn básekege qabiletti 30-40 kompanııa bar»,- dedi mınıstrdiń orynbasary.
