Portýgalııanyń Úkimet basshysy eldegi alapat órtti tragedııa dep atady
ASTANA. QazAqparat - Portýgalııanyń ortalyǵyndaǵy orman órtinen qurban bolǵandar sany 62-ge jetti, olardyń kóbi órt jaılaǵan jolda qalyp qoıǵan kólikterde qaza tapty, olardyń arasynda 4 bala bar, dep habarlaıdy www.bbc.com saıty.
Taratylǵan derekterge qaraǵanda, 30 adamnyń denesi kúre jol baǵytyndaǵy órtke oranǵan kólikterden, taǵy 17 adamnyń denesi tastap ketken kólikterdiń mańynan tabyldy. Soǵan qaraǵanda olar órtengen orman arqyly jaıaý júrip ótýge bel baılaǵan. Taǵy 11 adam Koımbra qalasyna jaqyn jerdegi Pedrogan-Grandı aýylynda qaıtys boldy. Taǵy birneshe adamnyń deneleri ár jerlerden tabyldy.
«Qaza tapqandar sany áli de artýy múmkin», - dep eskertti Portýgalııanyń Úkimet basshysy Antonıý Koshta azamattyq qorǵanys qyzmetiniń shtab-páterinde sóılegen sózinde.
Orman órtinen 60-tan astam adam túrli deńgeıdegi kúıik alǵan, olardyń arasynda qutqarýshylar orman arasynan adasyp júrgen jerinen taýyp alǵan 8 jasar qyz, órt sóndirý qyzmetkerleri bar.
Alapat tilsiz jaýdy aýyzdyqtaýǵa júzdegen órt sóndirý mashınalary men myńdaǵan órt sóndirýshi jumyldyrylǵanmen, jaǵdaıdy baqylaý ázirge múmkin bolmaı tur.
Eldiń Premer-Mınıstri bul oqıǵany «uly tragedııa» dep atady.
