Portýgalııalyq Pepe Eýropa chempıonatynda oınaǵan eń egde fýtbolshy atandy

ASTANA. KAZINFORM - Fýtboldan Eýropa chempıonatyna qatysyp jatqan portýgalııalyq fýtbolshy Pepe atalǵan dop dodasyndaǵy eń egde oıynshy atandy. 

Ol keshe, 18 maýsymda Portýgalııa men Chehııa kezdesýinde negizgi quramda jasyl alańǵa shyǵyp, 90 mınýt boıy oınady. Osylaısha ol 41 jas, 113 kún kórsetkishimen qurlyqtyq doda tarıhyndaǵy eń egde fýtbolshy boldy. Portýgalııalyq qorǵaýshy Vengrııanyń áıgili qaqpashysy Gabor Kıraıdyń (40 jas, 86 kún) rekordyn jańartty. 

Pepe ( tolyq esimi Képler Laverán Lı́ma Ferréıra) 1983 jyly 26 aqpanda Brazılııada dúnıege kelgen. Sporttyq mansabynda Portýgalııanyń «Marıtımý», «Portý», Ispanııanyń «Real Madrıd», Túrkııanyń «Beshıktash» klýbtarynda dop tepti. 

Ulttyq qurama sapynda 2007 jyldan beri 136 oıyn ótkizip, 8 goldyń avtory atandy. 

Eske salsaq, budan buryn túrkııalyq Arda Gıýler Ronaldýdyń rekordyn jańartty. Ol Túrkııa men Grýzııa kezdesýinde 65-mınýtta gol soǵyp, tusaýkeser oıynynda gol soqqan eń jas fýtbolshy (19 jas, 114 kún) boldy. 

Arda Gıýler bul golynyń arqasynda Portýgalııa quramasynyń shabýylshysy Krıshtıaný Ronaldýdyń 20 jyl saqtalǵan rekordyn buzdy.

Aıta keteıik, Krıshtıaný Ronaldý 2004 jyly Eýropa chempıonatyndaǵy tusaýkeser oıynynda (19 jas, 128 kún) Grekııa quramasyna gol soqqan edi.