Portýgalııaǵa saıahat jasaǵandar Brazılııa men Grekııaǵa maımyl sheshegin kirgizdi
NUR-SULTAN. QazAqparat – Brazılııa men Grekııa Portýgalııadan oralǵan saıahatshylardyń maımyl sheshegi vırýsyn juqtyryp kelgenin rastady, dep habarlaıdy QazAqparat tilshisi The Brazilian Report jáne Greek City Times-qa silteme jasap.
Brazılııa densaýlyq saqtaý mınıstrliginiń málimetinshe, Portýgalııadan kelgen naýqastan maımyl sheshegi anyqtalǵan. Onda 20 mamyrda ınfektsııa belgileri, atap aıtqanda qaltyraý, deneniń aýyrsynýy, qyzyl bórtpe paıda bolǵan. Naýqas baqylaýǵa alyndy.
Grekııanyń densaýlyq saqtaý agenttigi jasaǵan málimdemege sáıkes, bul elde de Portýgalııaǵa baryp kelgen saıahatshynyń sırek vırýs juqtyrý faktisi rastalǵan. Naýqas aýrýhanada jatyr, densaýlyq jaǵdaıy turaqty dep baǵalanyp otyr.
Buǵan deıin QazAqparat Eýropa men Soltústik Amerıkada maımyl sheshegine shaldyqqandar sany 780-ge jetkeni týraly habarlaǵan bolatyn.
