Portýgalııada jaǵajaı voleıbolynan jastar arasynda Álem chempıonaty ótip jatyr
ALMATY. 12 shilde. QazAqparat - Portýgalııanyń Portý qalasynda 19 jasqa deıingi jastar arasynda ótip jatqan Álem chempıonatyn qazaqstandyq jaǵajaı voleıbolshylary sátsiz bastady. Sársenbide jalaýy kóterilgen bul dúbirli dodada el namysyn Vıktor Pestov pen Kırıll Gýrın, Anna Eleferenko men Ekaterına Lasıýta qorǵap jatyr.
Búgin olar toptyq syndaǵy aqtyq oıyndaryn ótkizedi. Buǵan deıingi 2 kezdesýde Vıktor men Kırıll Italııa men Nıkaragýa, al Anna men Ekaterına Reseı men Italııa sportshylarynan jeńilip qaldy. Jarysty birden toptyq synnan bastaǵan jigitter búgin avstrııalyqtarmen, al qyzdar jarys qojaıyndarymen kúsh synasady. Eger bul synda mereıleri ústem shyqsa, jarysty ary qaraı jalǵastyrýǵa múmkindik alady, al jeńilip qalsa, jarysty erte aıaqtaıtyn bolady.
Almatylyq Vıktor Pestov pen Kırıll Gýrın bul dúbirli dodanyń joldamasyn Azııa chempıonatynda jeńip alǵan bolatyn. Odan keıin 21 jasqa deıingiler arasynda Horvatııada ótken Álem chempıonatyna qatysyp, onda irikteý kezeńinde súrinip, 37-shi oryndy qanaǵat tutqan edi. Al aqtaýlyq Anna Eleferenko men Ekaterına Lasıýta bolsa, Almatyda ótken chempıonattyń 2-shi týrynda jeńiske jetken. Ekaterına Lasıýta sondaı-aq, byltyr 19 jasqa deıingi jastar arasynda Kıprde ótken Álem chempıonatynda Aleksandra Varasovamen 1/16 fınalǵa deıin jetip, 17-shi satydan kóringen bolatyn.
