Portýgalııada orman órtimen 2 myńnan astam adam kúresip jatyr
ASTANA. KAZINFORM – Portýgalııanyń toǵyz aýdanynda ystyq ári qurǵaq aýa raıyna baılanysty órt qaýpiniń «qyzǵylt sary» deńgeıi jarııalandy. Eldiń qalǵan aýmaǵynyń basym bóliginde «sary» deńgeı qosylǵan, dep habarlaıdy Euronews.
Qazir búkil el boıynsha órtpen 2 myńnan astam órt sóndirýshi kúresip jatyr. Sonymen qatar tilsiz jaýdy aýyzdyqtaýǵa jıyrmadan astam ushaq pen tikushaq jumyldyrylǵan.
Apta basynan beri keminde bes órt sóndirýshi kúıik alǵan. Olardyń kóligi órt qursaýynda qalǵanymen, keıin top músheleri qaýipsiz jerge shyǵa alǵan.
Ótken aptanyń sońynan beri Portýgalııada úsh jańa órt oshaǵy tirkelip, olar qysqa ýaqytta baqylaýdan shyǵyp, qaýipti aýmaqqa deıin ulǵaıǵan. Máselen, Bragansa aýdanynda senbi kúni bastalǵan órt sońǵy birneshe kúnde 2 myń gektardan astam orman alqabyn joıdy.
Portýgalııa buqaralyq aqparat quraldarynyń málimetinshe, órttiń osynshalyqty jyldam taralýy sot talqylaýyna sebep bolýy múmkin. Birqatar jaǵdaıda jergilikti bılik qajetti sharalardy jedel qabyldamaǵan degen kúdik bar. Sondaı-aq órt sóndirýshilerdiń shuǵyl sheshim qabyldaý múmkindigi shektelgeni týraly aıtylyp jatyr.
Aıta ketelik Belgııa tarıhyndaǵy eń iri orman órti myńdaǵan gektardy sharpyǵan edi.
