Portýgalııada laı kóshkini turǵyn úıler men kóshelerdi basyp qaldy
ASTANA. KAZINFORM — Portýgalııanyń ortalyq bóliginde nóser jaýyn saldarynan kóshkin júrip, sý tasqyny boldy. Manteıgash qalasynda laı aǵyny turǵyn úılerdi, kósheler men avtokólikterdi basyp qalyp, eki adam baspanasyz qaldy, dep habarlaıdy Euronews.
Tabıǵı apat 19 qarashaǵa qaraǵan túni bolǵan. Tasjoldaǵy kóshkin sý aǵysynyń baǵytyn ózgertip, sonyń saldarynan sý men laı turǵyn úıler ornalasqan aýmaqqa qaraı aqqan. Keıbir avtokólikter tolyǵymen sý astynda qaldy.
Apat saldaryn joıýǵa 120 qutqarýshy men 42 tehnıka jumyldyryldy. Mýnıtsıpalıtette tótenshe jaǵdaıǵa baılanysty is-qımyl jospary engizildi.
Qala ákimi Flavıý Massanýdyń aıtýynsha, aqpan aıynda taý baýraıynan syrǵyǵan laı nóser jaýynnan keıin qalaǵa jetip, kósheler men kópirlerdi basyp qalǵan.
Qolaısyz aýa raıyna baılanysty bastaýysh mektepter men keıbir balabaqshalar jabyldy. Zardap shekkender men habar-osharsyz ketkender joq. Baspanasyz qalǵan eki turǵynǵa kómek kórsetildi.
Qutqarýshylar joldardy laıdan tazalap, kólik qozǵalysyn qalpyna keltirip jatyr. Jumystar birneshe kúnge sozylýy múmkin.
Eske salaıyq, buǵan deıin Ystanbulda qaýiptiń «sary» deńgeıi jarııalanǵan bolatyn. Qalada myńnan astam úıdi sý basyp, 15 kóshkin júrdi.