Portýgalııada «Klaýdııa» daýyly basylmaı tur
ASTANA. KAZINFORM — Ekpindi «Klaýdııa» daýyly Portýgalıny qıratyp, úsh adamnyń ómirin qıdy, ondaǵan adam jaraqat aldy, dep jazdy Gismeteo portýgaldyq bılikke silteme jasap.
Al, dál osy sátte Ulybrıtanııada qutqarý qyzmeti Ýels pen Anglııadaǵy iri tasqynǵa baılanysty turǵyndardy evakýatsııalap jatyr, dep Reuters jazdy.
Birneshe kún boıy Portýgalııa men kórshiles Ispanııanyń keıbir aımaqtaryn daýyldyń áserinen qolaısyz aýa raıy áýrege saldy. Senbige qaraı daýyl Ulybrıtanııa men Irlandııa aýmaǵyna jetti.
Qutqarýshylar beısenbi kúni Lıssabonnan Tejý ózeniniń qarsy jaǵasynda ornalasqan Fernaý-Ferrý aýylyndaǵy sýǵa batqan úıden egde jastaǵy erli-zaıyptylardyń denesin tapty. Aldyn ala boljam boıynsha, olar uıyqtap jatqan kezde sý deńgeıi túnde kenet kóterilip, úıden shyǵa almaǵan.
Osy senbide «Klaýdııa» daýyly ońtústik jaǵalaýdaǵy kýrorttyq Albýfeıra qalasynda tornado týdyrǵany habarlandy. Jelide jarııalanǵan vıdeolarda tornadonyń kempıngtegi avtokemperlerdi qıratqany kórinedi. Aımaqtyq azamattyq qorǵaý basshysy Vıtor Vaza Pıntýnyń aıtýynsha, osy oqıǵada 85 jastaǵy brıtan týrısti qaza tapqan.
Sondaı-aq, kórshiles qonaqúıde 28 adam jaraqat alǵan, onyń ekeýi aýyr jaraqatpen aýrýhanaǵa jetkizilgen.
Daýylmen kelgen qatty jańbyr Ýelstiń ońtústik-shyǵysyndaǵy Monmýt qalasy men mańaıyndaǵy aýdandarda keń kólemdi tasqynǵa sebep boldy. Ońtústik Ýels órt-qutqarý qyzmetiniń málimeti boıynsha, qutqarý operatsııalary júrgizilip, turǵyndar evakýatsııalanyp, olardyń qaýipsizdigi tekserilip jatyr.
Ýels úkimetiniń ókili habarlaǵandaı, «Klaýdııa» daýyly saldarynan bir túnde birneshe aýdandy sý basyp, turǵyn úılerge, bıznes nysandaryna, kólik ınfraqurylymyna jáne energetıkalyq obektilerge zaqym kelgen.
Áýeden túsirilgen fotosýretter apattyń aýqymyn kórsetip otyr: Monmýt ortalyǵy men turǵyn aýdandar sý astynda qalǵan, óıtkeni jaqyn jerdegi ózen arnasynan asyp ketken.
Ýels tabıǵı resýrstar mınıstrligi 11 tasqynǵa qatysty eskertý jarııalaǵan, onyń ishinde tórt mańyzdysy jáne 17 salystyrmaly túrde jeńil eskertý bar.
Al Anglııada Qorshaǵan ortany qorǵaý agenttiginiń málimetinshe, 49 tasqynǵa baılanysty eskertý jáne 134 qosymsha eskertýler jarııalanǵan.
Aıta keteıik, Portýgalııa sheteldikter úshin turǵyn úı satyp alý erejelerin qatańdatty.