Portýgalııada azyq-túlik baǵasy sońǵy tórt jyldaǵy eń joǵary deńgeıge jetti

ASTANA. KAZINFORM –  Portýgalııada azyq-túlik sebetiniń baǵasy sońǵy 4 jyldaǵy eń joǵary deńgeıge jetti, alaıda baǵa ósimi búkil Eýropada baıqalyp otyr, dep habarlaıdy Euronews.

2022 jylǵy 5 qańtarmen salystyrǵanda, DECO PROteste baqylap otyrǵan jáne 63 taýardan turatyn azyq-túlik sebetiniń baǵasy 35,02%-ǵa ósti. Alaıda Portýgalııa jalǵyz emes — sońǵy ýaqytta Eýropanyń birqatar elderinde de osyndaı úrdis baıqalady.

Tutynýshylar quqyǵyn qorǵaý uıymy DECO PROteste júrgizgen taldaý ótken beısenbide jarııalanyp, sońǵy tórt jylda otbasylyq azyq-túlik sebetteri «eshqashan munshalyq qymbat bolmaǵanyn», jyl basynan beri baǵasy shamamen 12 eýroǵa artqanyn kórsetti.

4–11 aqpan aralyǵyndaǵy aptada uıym baqylaǵan azyq-túlik sebetiniń quny shamamen 253,43 eýro bolyp, aldyńǵy aptamen salystyrǵanda 34 tsentke (0,13%) ósken. Qaýymdastyq bul kezeńde atalǵan ónimder jıyntyǵy baǵasynyń baǵalaý júrgizilgen ýaqyt ishindegi eń joǵary deńgeıge jetkenin málimdedi.

2022 jylǵy 5 qańtarmen salystyrǵanda baǵa ósimi 65,73 eýro nemese 35,02% boldy.

2026 jyldyń basynan beri portýgalııalyq tutynýshylar úshin bul sebettiń quny 4,8%-ǵa (11,61 eýro) artty, sonyń saldarynan azyq-túlik shyǵyndary otbasylyq bıýdjetke túsetin salmaqty kúsheıtti.

Ár sársenbi kúni DECO et, balyq, muzdatylǵan ónimder, jemis-kókónis, sút ónimderi jáne bakaleıa taýarlary kiretin 63 ónimnen turatyn «jalpy sebet qunyn» iri sýpermarketter men onlaın-dúkenderdegi aldyńǵy kúngi baǵalar negizinde taldaıdy.

Sodan keıin ár taýardyń barlyq onlaın-dúkender boıynsha ortasha baǵasy eseptelip, barlyq taýardyń ortasha baǵasyn qosý arqyly sol kúngi sebet quny anyqtalady.

Aptalyq taldaý boıynsha eń kóp qymbattaǵan ónimder — kádi (29%), untaqtalǵan kofe (19%) jáne makaron ónimderi (16%). Al osy jyldyń birinshi aptasymen salystyrǵanda eń qatty qymbattaǵan taýarlar — kádi (96%), qara qabyrshaqty balyq (23%) jáne teńiz doradasy (21%).

Sońǵy tórt jylda qymbattaǵan sıyr eti (119%), jumyrtqa (86%) jáne untaqtalǵan kofe (76%).

Azyq-túlik baǵasynyń ósýi tek Portýgalııaǵa tán emes. Buǵan deıin Euronews habarlaǵandaı, Eurostat derekteri boıynsha, Eýropalyq Odaq elderinde 2025 jyly azyq-túlik baǵasy orta eseppen 2,8%-ǵa ósken.

Keıbir taýarlar boıynsha ınflıatsııa 10%-dan asqan, mysaly, shokolad (17,9%), muzdatylǵan jemister (13%), sıyr jáne buzaý eti (10%) aıtarlyqtaı qymbattady.

Eýropada azyq-túlik baǵasynyń eń joǵary ósimi Túrkııada (32,8%) tirkeldi, odan keıin Kosovo (7,6%). Eýroodaqqa múshe elder arasynda Rýmynııa (6,7%), Estonııa (6,2%) jáne Bolgarııa (5,7%) erekshelenedi.

Qurlyqtyń ońtústigindegi elderde de jaǵdaı kúrdelengen: Malta (3,1%), Italııa (2,5%), Ispanııa (2,1%) jáne Grekııa (2,0%) elderinde 2025 jyly azyq-túlik baǵasy ósti.

Portýgalııada azyq-túlik ınflıatsııasy 2,8% bolyp, EO-daǵy ortasha deńgeıge sáıkes keledi.

Eýropada tek Shveıtsarııada azyq-túlik baǵasy tómendegen (2024 jylmen salystyrǵanda −1,1%), al Kıprde ózgeris baıqalmaǵan. 

Aıta ketelik Portýgalııadaǵy daýyl 16 adamnyń ómirin qıǵan edi.