Portýgalııada apatty jaǵdaıda qonǵan ushaq: Toty Ámirova pikir bildirdi
ASTANA. QazAqparat - Portýgalııada apatty jaǵdaıda qonǵan ushaqqa qatysty Azamattyq avıatsııa komıteti tóraǵasy orynbasarynyń mindetin atqarýshy- bas memlekettik avıatsııalyq ınspektory Toty Ámirova óz pikirin bildirdi, dep habarlaıdy QazAqparat.
«Olardyń aldynda men basymdy ıemin. Aldyn ala aıtyp qoıaıyn, bul meniń jeke pikirim. Birinshiden, ekıpaj qolda bar resýrstardy barynsha paıdalandy, bul degenimiz jermen radıoalmasý, áskerı joıǵyshtardyń kómegi jáne «Apat» dabylyn soǵý. (Jaı kezde ushqyshtar habarlamaı ózdiginen sheshýge tyrysady); ekinshiden, jerge jolamaı, bulttardan joǵaryǵa kóterildi jáne basqarýsyz ushaqty ózderinen ıgerýge tyrysty; adam aıtqysyz apatty jaǵdaıda shtýrvaldy (tutqa) tastamaı aqyryna deıin kúresti; eki ret qona almaǵandyqtaryna qaramastan tabandylyq tanytyp 3-inshi ret degende qondyrdy; olar basqara almaıtynyn túsinip ushaqty birneshe ret teńizge qaraı baǵyttaýdy surady. Basqarýsyz qalǵan jáne úlken ushaqty sý ústine qondyrýda tiri qalý múmkindigi tym az, alaıda qurǵaq jerde de sondaı múmkindik edi. Menimshe, bul osyndaı apatty jaǵdaıda tiri qalýdaǵy alǵashqy oqıǵa.Tekserý jumystary aıaqtalǵan soń álemniń barlyq ushqyshtary atalǵan oqıǵany oqý quraly retinde zerdeleıtin bolady», - dep jazady Toty Ámirova óziniń Feısbýktegi paraqshasynda.
Eske sala keteıik, 11 qarasha kúni «Eır Astana» áýe kompanııasynyń Embraer-190 ushaǵynan Portýgalııada tehnıkalyq qyzmetten keıingi ushý kezinde tehnıkalyq aqaý tabylyp, ekıpaj Portýgalııanyń Beja qalasyndaǵy aerodromǵa qonýǵa májbúr bolǵan edi.
Erteńinen «Air Astana» áýe kompanııasynyń basshylyǵy oryn alǵan oqys oqıǵaǵa qatysty túsinik berdi.
