Portýgalııada 25 jastaǵy fýtbolshy match kezinde qaıtys boldy
ASTANA. KAZINFORM — Portýgalııada fýtbol matchy kezinde oıynshy alańda kóz jumdy. Anglııanyń birneshe klýbynda óner kórsetken Kevın Kastro Portýgalııanyń tórtinshi dıvızıonynda oınaıtyn «Real Klýbe de Massama» komandasynyń basty jańa oıynshysy retinde tanystyrylǵan edi, dep habarlaıdy euronews.
Kevın Kastro osy maýsym bastalardan eki aıǵa jeter-jetpes ýaqyt buryn «Real Klýbe de Massama» komandasynyń negizgi jańa oıynshysy retinde tanystyrylǵan. Portýgalııanyń tórtinshi dıvızıonynda oınaıtyn bul klýbqa kelgen Kevın Kastronyń buǵan deıingi fýtboldaǵy mansaby erekshe bolǵan. Ol «Sportıng» akademııasyn aıaqtaǵannan keıin 2021 jyly Anglııanyń ekinshi deńgeıli Chempıonshıp lıgasynda «Vest Bromvıch Albıon» sapynda oınady. Sol kezde ol Anglııa Lıga kýbogy aıasyndaǵy «Arsenalǵa» qarsy matchta alańǵa shyǵyp, jarqyn debıýt jasaǵan.
Angoladan jáne San-Tome men Prınsıpıden shyqqan ata-ananyń uly portýgalııalyq fýtbolshy senbi kúni óziniń qazirgi klýby men «Estrela da Amadora» arasyndaǵy joldastyq kezdesý kezinde qaıǵyly jaǵdaıda kóz jumdy. Ol nebári 25 jasta bolǵan.
Bul — fýtbol alańynda bolǵan taǵy bir kútpegen ólim jaǵdaıy. Matchtyń 15-mınýtynda Kevın Kastro esinen tanyp, alańǵa qulaǵan. Medıtsınalyq brıgadalardyń kórsetken kómegine qaramastan, ony aman alyp qalý múmkin bolmady. Oıynshy shuǵyl túrde aýrýhanaǵa jetkizilgenimen, dárigerler onyń qaıtys bolǵanyn konstatatsııalady.
«Vest Bromvıch Albıonnan» ketkennen keıin Kastro Anglııanyń tómengi dıvızıondaryndaǵy birneshe komandada óner kórsetip, keıin Portýgalııaǵa oralǵan.
Buǵan deıin Ońtústik Afrıkanyń fýtbolshysy Djeıden Adams álem chempıonatynan oralǵannan keıin qaıtys bolǵany týraly habar tarady.
Sonymen qatar, tanymal jattyqtyrýshy, Qazaqstan ulttyq quramasynyń burynǵy oıynshysy Aleksandr Lısın 55 jasqa qaraǵan shaǵynda ómirden ótkeni belgili boldy.
