Portýgalııada 2,2 mln lıtr ishimdik kóshege tógildi
LISSABON. QazAqparat – Jeksenbi kúni Portýgalııadaǵy Anadııa shaǵyn qalasynyń kóshelerinde qyzyl sharap ózen bolyp aqty. Jergilikti Levira araq-sharap zaýytyna tıesili eki tsısterna jarylyp, qala kóshelerine 2,2 mln lıtr alkogol tógildi, dep habarlaıdy QazAqparat New York Post basylymyna silteme jasap.
Jelide jarııalanǵan vıdeoda 2000-ǵa jýyq turǵyny bar Anadııa qalasynda kóshe boıyn jaǵalaı qyzyl sharap aǵyp jatqany kórinedi.
Tógilgen sharaptyń kóptigi sonshalyq, onymen olımpıadalyq júzý basseınin toltyrýǵa bolady.
Qala bıligi ekologııalyq dabyl qaǵyp, tógilgen alkogol jergilikti Chertıma ózenin lastamaýy úshin shuǵyl áreketke kiristi.
Jergilikti BAQ-tyń habarlaýynsha, Anadııa órt sóndirý bólimi «sharap tasqynyn» bógep, ózenge jetkizbeı, jaqyn mańdaǵy egistikke baǵyttaǵan.
Órt sóndirýshiler alkogol zaýytynyń janyndaǵy úıdiń jertólesi sharapqa tolǵanyn habarlady.
Araq-sharap zaýyty bolǵan oqıǵa úshin halyqtan keshirim surap, sharap sińgen topyraqty qazyp alǵanyn aıtty.
«Biz tazalaý jáne zaqymdanǵan jerlerdi jóndeý ketken búkil shyǵyndy óz moınymyzǵa alamyz», - delingen zaýyt málimdemesinde.
