Portýgalııada 14 jastaǵy jasóspirim orman órtin qoıǵanyn moıyndady
ASTANA. KAZINFORM — 20 tamyzǵa deıin Portýgalııanyń sot polıtsııasy órt qoıýǵa qatysy bar degen kúdikpen 52 adamdy ustady, dep habarlaıdy Euronews.
Fafe mýnıtsıpalıtetine qarasty Seıdoınshadan shyqqan 14 jastaǵy jasóspirim birneshe órt qoıǵanyn moıyndady. Onyń áreketteriniń saldarynan bıyl jazda Portýgalııanyń soltústiginde orman órti shyqqan. Jasóspirim jıi ormandy aımaqtarǵa skýtermen baryp, sirińkemen ot tutatyp, úıine qaıtyp otyrǵan.
Bul týraly Portýgalııanyń sot polıtsııasy málimdedi.
— Múmkin, kámeletke tolmaǵan bala mekteptegi úlgeriminiń nasharlyǵyna jáne áleýmettik baılanystarynyń álsizdigine baılanysty ashý men kúızelisten osyndaı áreketke barǵan bolýy yqtımal, — delingen sot polıtsııasynyń málimdemesinde.
Atalǵan aımaqtaǵy qaıtalanatyn órtter tergeýdiń bastalýyna sebep bolǵan.
Tergeýdi júrgizgen Braga sot polıtsııasy isti prokýratýraǵa joldady. Keıin ol otbasy jáne balalar isteri jónindegi sotqa beriledi.
20 tamyzǵa deıin Portýgalııada órt qoıýǵa qatysy bar degen kúdikpen 52 adam qamaýǵa alynǵan. Lusa aqparat agenttiginiń derekteri boıynsha, tutqyndaýlardyń basym bóligi tamyz aıynda jasalǵan.
Juma tańerteń Portýgalııa aýmaǵynda 97 órt tirkelgen, biraq olardyń basym bóligi sóndirý satysynda bolǵan.
Buǵan deıin Ispanııadaǵy orman órti aýyl sharýashylyǵyna 600 mln eýro shyǵyn keltirgeni týraly jazǵan edik.