Portýgalııa Ýrýgvaımen kezdesý aldynda standarttar kezinde qorǵanýdy pysyqtap jatyr
ASTANA. QazAqparat - Búgin Reseı jasyl alańdarynda ótip jatqan 2018 jylǵy Álem chempıonatynyń 1/8 fınaly aıasynda Ýrýgvaı jáne Portýgalııa quramalary kezdesedi, dep habarlaıdy QazAqparat tilshisi.
Ýrýgvaı men Portýgalııanyń resmı týrnırler aıasynda alǵash ret joldary túıiskeli tur. Jalpy, FIFA reıtıngindegi ornyn esepke almaǵanda, deńgeıleri shamalas ujymdardyń oıynyna kýá bolamyz dep aıtýǵa bolady. Sondyqtan da oıyn aldynda boljam aıtýǵa tipti asa synshyl fýtbol sarapshylarynyń da batyly barmaı otyr.
Oıyn ádisterine baılanysty, Ýrýgvaı alań ortalyǵynda birshama basymdyqqa ıe bolyp, Portýgalııa eki qaptalmen jyldam shabýyldaýǵa ıek artýy múmkin. Ýrýgvaıdyń bir basymdyǵy retinde Edınson Kavanı, Lýıs Sýares sııaqty álemdik deńgeıdegi shabýylshylarynyń kóbirek ekendigin atap kórsetemiz. Bul jaǵynan portýgaldar asa maqtana almaıdy. Toptyq kezeńdegi oıyndarda osy jaıt aıqyn baıqalyp qaldy. Olardyń bas juldyzy Krıshtıaný Ronaldýǵa laıyqty serik bolatyndaı fýtbolshy tabyla qoıǵan joq. Esesine Fernandý Santýsh shákirtteri qarsylastyń babyna qaraı oınaýdyń údesinen shyǵyp júr.
Bas bapker - eki komandanyń da basty jetistigi deýge bolady. On eki jyldan beri qurama komandany jattyqtyryp júrgen Oskar Tabares pen oıynshylar arasyndaǵy qarym-qatynasty áke men balanyń arasyndaǵy jaqyndyqqa teńeýge bolady. Dál osyndaı pikirdi Fernandý Santýsh týraly da aıta alamyz.
Ýrýgvaılyqtar Álem chempıonaty bylaı tursyn, bıyldyqqa áli jeńilip te kórgen joq, Kevın Mýsleranyń qaqpasyna gol da soǵylǵan joq. Jyl basynan beri ótkizgen alty oıynnyń altaýynda da jeńiske jetti. Latyn Amerıkasy ókilderi toptyq kezeńdegi bes golynyń barlyǵyn da standarttar arqyly soqty. Fernandý Santýsh oıyn aldyndaǵy daıyndyq kezinde dál osy aspektige erekshe nazar aýdardy. Portýgalııa quramasynyń mýndıaldaǵy resmı tilshisi Rakel Brankonyń aıtýynsha, BAQ ókilderi úshin ótkizilgen 15 mınýttyq ashyq jattyǵýlar kezinde portýgalııalyqtar qarsylastyń standarttary kezinde qorǵanýdyń amal-tásilderin pysyqtap, penaltı tebý daǵdysyn jetildire túsken.
Al endi is júzinde munyń qanshalyqty nátıje beretinin «Fısht» stadıonynda bolatyn oıyn kórsetedi. Matchtyń tikeleı translıatsııasy Qazaqstan jáne Qazsport telearnalarynda Astana ýaqytymen 00:00-de bastalady. 1/8 fınaldyń qalǵan oıyndarynyń kestesin myna jerden kórýge bolady.
