Portýgalııa ishki týrızmge 11 mln eýro ınvestıtsııa salady
ASTANA. KAZINFORM — Jobalar Portýgalııanyń ishki óńirlerinde tabıǵı, gastronomııalyq, saýyqtyrý jáne mádenı týrızmdi damytýǵa baǵyttalyp, týrıster aǵynyn Lıssabon men Portý sııaqty dástúrli ortalyqtardan basqa baǵyttarǵa burýdy kózdeıdi, dep habarlaıdy Euronews.
«Portýgalııa» degende kóbine Lıssabon, Portý nemese Algarve ońtústik jaǵalaýy elesteıdi.
Alaıda kópmıllıondyq ınvestıtsııa osy qalyptasqan baǵyttardan tys aımaqtarǵa nazar aýdaryp, eldiń týrıstik kartasyn birtindep qaıta qalyptastyrýǵa baǵyttalǵan.
Úkimet jalpy quny 4,5 mln eýro bolatyn 12 týrıstik jobany qarjylandyrady. Jalpy ınvestıtsııa kólemi shamamen 11 mln eýro bolady. Bul qarajat Portýgalııanyń soltústigi men ortalyǵynda, sondaı-aq Alentejý jáne Rıbatejý óńirlerinde týrızmdi damytýǵa serpin bermek.
Bul bastama 2025 jylǵy aqpanda iske qosylǵan, bıýdjeti 30 mln eýro bolatyn «Týrızm arqyly ósim» atty keń aýqymdy baǵdarlamanyń bir bóligi.
Jańa qarjylandyrý memlekettik qurylymdarǵa, jeke kompanııalarǵa jáne salalyq uıymdarǵa baǵyttalǵan. Basymdyq tabıǵı, gastronomııalyq, belsendi, saýyqtyrý jáne mádenı týrızm sııaqty negizgi baǵyttarǵa beriledi.
Aýqymdy jobalar jańa týrıstik ónimder jasaýǵa, «aqyldy» aýmaqtardy damytýǵa, tarıhı jáne mádenı murany jańǵyrtýǵa, sondaı-aq turaqty damý qaǵıdattaryn ilgeriletý men qalalardy jańartýǵa baǵyttalǵan.
Bólingen qarajat týrızm salasy qyzmetkerleriniń biliktiligin arttyrý baǵdarlamalaryn júzege asyrýǵa da múmkindik beredi. Ásirese, osal toptaǵy qyzmetkerlerdi oqytý men olardyń kásibı daǵdylaryn damytýǵa kóńil bólinedi.
Investıtsııalyq kelisimsharttarǵa qol qoıý barysynda ekonomıka jáne aýmaqtyq tutastyq mınıstri Kashtrý Almeıda iri jobalarmen qatar, «ásirese ishki óńirlerde júzege asyrylatyn, mádenı jáne tabıǵı murany ashýǵa baǵyttalǵan, sheteldik týrıster úshin qyzyqty ári jańa shaǵyn bastamalar da bar» ekenin atap ótti.
Mınıstrdiń aıtýynsha, mundaı shaǵyn týrıstik jobalardy «ilgeriletý jáne keńinen tanytý» qajet.
Turismo de Portugal agenttiginiń derekterine sáıkes, 2025 jyly Portýgalııaǵa 32,5 mln adam kelgen, onyń 19,7 mıllıony — sheteldik týrıster.
Negizgi týrıster kelgen elder qatarynda Ulybrıtanııa men AQSh bar — tıisinshe 2,5 mln jáne 2,4 mln adam. Odan keıin Ispanııa, Germanııa jáne Frantsııa elderi keledi, olar da mıllıondaǵan týrıst aǵynyn qamtamasyz etken.
Ulttyq týrıstik vedomstvo málimetinshe, kelýshiler sanynyń artýy týrızmnen túsken tabysty 29,1 mlrd eýroǵa jetkizgen. Alaıda jergilikti turǵyndar Lıssabon men Portý sııaqty tanymal baǵyttardaǵy týrısterdiń shamadan tys kóptigine jıi narazylyq bildirip otyr.
— Bul óte oǵash. Elestetip kórińiz, men úlken qalanyń qaq ortasynda tursam da, kórshilerim joq, — deıdi Lıssabon turǵyny.
Onyń aıtýynsha, páterlerdiń kóbi týrısterge jalǵa beriletindikten, qalanyń keıbir aýdandary «eles qalaǵa» uqsap ketken.
Almeıda týrızmniń damýyna áldeqaıda oń kózqaraspen qaraıdy. Ol bul salany «óte mańyzdy», «eldi alǵa súıreıtin» baǵyt dep atady.
— Jyldyń belgili bir aptasynda nemese eldiń keıbir aımaqtarynda týrıster tym kóp bolýy múmkin, biraq jalpy alǵanda, el kóleminde jáne jyl boıy týrıster artyq emes, — dep qosty.
Aıta ketelik Portýgalııada azyq-túlik baǵasy sońǵy tórt jyldaǵy eń joǵary deńgeıge jetti.
