Portýgalııa men Ispanııada jaryq berý júıesi qalpyna keltirildi

ASTANA. KAZINFORM – Keshegi jappaı elektr qýatynyń óshýinen keıin Portýgalııa men Ispanııada jaryq berý júıesi qaıta qalpyna kele bastady. 29 sáýir, seısenbi kúni tańerteń Ispanııanyń REE energetıkalyq kompanııasy eldiń materıktik bóliginde elektr energııasynyń shamamen 90 paıyzy qalpyna keltirilgenin habarlady, dep jazady DW.

Ispanııalyq Red Electrica operatory qazirgi tańda tutynýshylardyń suranysy 99,16% deńgeıinde qamtamasyz etilgenin, al eldegi barlyq qosalqy stantsııalardyń qalypty jumys istep turǵanyn naqtylady.

– Qos eldiń jelilik operatorlary aqaýdyń sebebin anyqtaý jáne elektrmen jabdyqtaýdy qalpyna keltirý boıynsha jumys isteýde. Qazirgi ýaqytta kıbershabýyl belgileri baıqalǵan joq, – dep málimdedi Eýropa keńesiniń tóraǵasy Antonıý Koshta.

AFP agenttiginiń málimetinshe, Portýgalııadaǵy REN jelilik operatory bir tún ishinde 6,5 mıllıon úıdiń 6,2 mıllıonyna jaryq qaıta qosylǵanyn habarlaǵan.

28 sáýir, dúısenbi kúni mıllıondaǵan turǵyn, sonyń ishinde Madrıd pen Lıssabon halqy jaryqsyz qaldy. Aýqymdy aqaýlar Ispanııa, Portýgalııa, Frantsııanyń ońtústik-batysy men Andorrada oryn alǵan.

Elektr aqaýy saldarynan metro men poıyzdar toqtap, baǵdarshamdar óshti, ınternet pen mobıldi baılanys úzilip, adamdar lıftilerde qalyp qoıdy. Tek Madrıdte ǵana qutqarýshylar 286 ret kómek kórsetý operatsııasyn ótkizgen. Ispanııanyń Adif temirjol kompanııasy el kólemindegi poıyz qozǵalysynyń toqtaǵanyn rastady.

Ispanııa Kólik mınıstrliginiń dereginshe, on bir poıyzdan jolaýshylardy evakýatsııalaý on saǵattan keıin de aıaqtalmaǵan. Jol qozǵalysyn qadaǵalaıtyn DGT mekemesi júrgizýshilerge jolǵa shyqpaýǵa keńes berdi.

Ispanııa áýejaılarynda reısterdiń keshigýi baıqaldy. Eurocontrol uıymynyń málimetinshe, elektr qýatynyń úzilýi Madrıd, Barselona jáne Lıssabonmen áýe qatynasyna áser etken.
Aıta keteıik, buǵan deıin Ispanııa men Portýgalııa elektr jaryǵynsyz qalǵanyn habarlaǵan edik.