Portýgalııa men Danııa Qazaqstanmen kólik tasymaly týraly kelisimdi rásimdeıdi - Roman Sklıar
Osy joly senatorlar «Halyqaralyq avtomobıl qatynasy týraly Qazaqstan Respýblıkasynyń Úkimeti men Ázerbaıjan Respýblıkasynyń Úkimeti arasyndaǵy kelisimdi ratıfıkatsııalaý týraly» zań jobasyn qarady. QR Investıtsııalar jáne damý vıtse-mınıstri Roman Sklıardyń aıtýynsha, atalǵan qujat eki memleket arasyndaǵy avtomobıl tasymalyna quqyqtyq negiz jasaıdy. Kelisim aıasynda kólik tasymalynyń túrleri men tıisti kvotalardyń tártibi retteledi.
«Qazaqstannyń tıimdi geografııalyq ornalasýyn eskere otyryp, biz tranzıttik áleýetimizdi barynsha damytýǵa kúsh salyp jatyrmyz. Negizgi maqsat - Ortalyq Azııada iri logıstıkalyq habty qurý. Osy ýaqytqa deıin 41 memleketpen halyqaralyq avtomobıl qatynasy týraly kelisimder rásimdeldi. Ázerbaıjan da odan tys qalmaýy qajet. Sońǵy jyldary Qazaqstan men Ázerbaıjan arasyndaǵy avtokóliktermen júk tasymaldaý kólemi 16 paıyzǵa artyp, 6,2 myń tonnany qurady. Búgingi kelisimniń arqasynda biz osy tasymaldy kúsheıte alamyz», - dep atap kórsetti R.Sklıar.
Onyń sózine qaraǵanda, aldaǵy ýaqytta Portýgalııa men Danııa sııaqty memlekettermen ózara kelisim jasaý josparlanyp otyr. «Biz taǵy eki kelisimdi rásimdeımiz. Sonymen boldy. Bizdiń endigi mindetimiz - tasymaldyń kólemin arttyrý», - dep atap kórsetti R.Sklıar.
