«Portýgalııa – Qazaqstan» saýda palatasynyń tóraǵasy Alǵys aıtý kúniniń mańyzdylyǵyn aıtty
NUR-SULTAN. QazAqparat – Pandemııa saldarynan barsha álem tap bolǵan qıyndyqtar bizden tózimdilikti talap etedi. Qazaqstan halqy indetpen kúresti birlesip jeńýge bolatynyn jaqsy biledi. «Portýgalııa – Qazaqstan» saýda palatasynyń tóraǵasy, «Kazakh Invest» táýelsiz ókili Nýno Mıgel Afonso Lopes osyndaı pikir bildirdi, dep habarlaıdy QazAqparat.
«Qazaqstanda atalyp ótip júrgen Alǵys aıtý kúni – ol erekshe otbasylyq mereke. Pandemııa saldarynan barsha álem tap bolǵan qıyndyqtar bizden tózimdilikti talap etip otyr, al Qazaqstan halqy indetpen kúresti tek birlesip jeńýge bolatynyn jaqsy biledi. 2015 jyly alǵash ret Qazaqstanǵa kelgen bolatynmyn, sodan beri osynda jylyna birneshe ret saparlaımyn. Qazaqstanda ózimdi otanymda júrgendeı sezinemin, buǵan kóptegen uqsastyqtar sebep bolyp otyr. Osy oraıda Qazaqstandaǵy jáne Portýgalııadaǵy otbasylyq qundylyqtardy mysalǵa alýǵa bolady», - dedi Nýno Lopes.
Sonymen qatar ol Qazaqstanda qabyldaǵan azamattarǵa alǵys aıta kele, mamandardyń jaqsylyǵyn, qyzmettegi kásibıligin erekshe atap ótti.
Onyń paıymynsha, Qazaqstan halqyn beıbitshilik pen kelisim, súıispenshilik ıdeıasy biriktirip otyr.
«Qazaqstan men Portýgalııanyń yntamaqtastyǵyn damytý úshin tájirıbesimen, bilimimen bólisip, múmkindik jasaǵan memlekettik jáne jeke uıymdarǵa alǵys aıtamyn. Munymen qosa, saýda palatasynyń tóraǵasy retinde meniń mıssııamdy oryndaýǵa qoldaý kórsetken Portýgalııadaǵy Qazaqstan Elshiligine rızashylyǵymdy bildiremin», - dedi N. Lopes.
