Portýgalııa EÝRO-2016 týrnırinde Islandııamen teń tústi

Sent-Eten qalasynyń «Joffrýa-Gıshar stadıonynda ótken kezdesý 1:1 esebimen aıaqtaldy.
Islandııa Eýropa chempıonatynyń fınaldyq kezeńine alǵash ret shyǵyp otyrǵan komanda. Lars Lagerbektiń komandasy tuńǵysh qadasyn jaman bastaǵan joq.

Kezdesý Ronaldý men Nanıdiń ótkir shabýylymen bastaldy. Óz kezeginde ıslandııalyqtar da shette qalǵan joq, Gılfı Sıgýrdsson tepken dopqa qaqpashy Rýı Patrısıý tosqaýyl boldy.

Ary qaraı oıyn qarqyny arta berdi. Nanı men Ronaldý jaqsy soqqylar jasady, alaıda Hannes Haldersson ózin myqty qaqpashy ekenin taǵy bir dáleldedi.

Degenmen, qaıta-qaıta qarsylastaryn qyspaqqa alǵan Portýgalııa fýtbolshylary birinshi taımda esep ashty. Oıynnyń 31-mınýtynda Nanı qaptaldan berilgen pasty qaqpaǵa súńgitti.

Ekinshi taım portýgaldyqtardyń shabýylymen jalǵasty. Biraq, ıslandııalyqtar 51-mınýtta gol salyp, jankúıerlerin bir qýantyp tastady. Gol avtory - Bırkır Bıarnasson.

Portýgalııa quramasy qolda turǵan jeńistiń sýsyp ketkenine qapalanyp, ıslandııalyqtardyń qaqpasyna lap qoıdy. Degenmen, kóp shabýyldyń eshqaısysy nátıjeli bolmady.

Aıta keteıik, fýtboldan Eýropa chempıonaty Frantsııada ótýde. Birinshiliktiń aıasy bıyldan bastap keńeıip, qurlyqtyq dodada 16 qurama emes, 24 komanda oınaıtyn bolady. Fýtbolsúıer qaýym «kári qurlyqtyń» eń myqty quramalarynyń qatysýymen 51 match tamashalaı alady.

Eýropa birinshiligi Frantsııanyń on qalasynda 10 maýsym men 10 shilde kúnderi aralyǵynda ótedi.
Barlyq matchtar «Qazaqstan» men «Qazsport» telearnalarynda tikeleı efırde kórsetiledi.