Portýgalııa bıznesi Qazaqstandaǵy avtomobıl joldary salasyndaǵy birqatar kontsessııalyq jobalardy birlesip júzege asyrýǵa múddeli

Bul týraly QazAqparat QR Kólik jáne kommýnıkatsııa mınıstrliginiń baspasóz qyzmetine silteme jasap habarlaıdy.

Baspasóz qyzmetiniń málimetinshe, Kólik jáne kommýnıkatsııa mınıstriniń mindetin atqarýshy Erkin Dúısenbaev jaqynda Portýgalııanyń bıznes-delegatsııasymen kezdesip, olardy Qazaqstannyń kólik salasynyń qazirgi jaı-kúıi men damý perspektıvalary jaıynda keńinen habardar etken. «Atap aıtqanda, avtomobıl joldary salasyndaǵy birqatar kontsessııalyq jobalardy usyndy. Olardyń biri uzaqtyǵy 238 shaqyrym tórt jolaqty І tehnıkalyq sanattaǵy Astana - Qaraǵandy avtomobıl joly.Jobanyń quny 895 mln AQSh dollary. Onyń konkýrsy aǵymdaǵy jyldyń maýsym aıynda ótkiziledi. Tamyz aıynda tórt jáne alty jolaqty І tehnıkalyq sanattaǵy uzaqtyǵy 104 shaqyrym Almaty -Qapshaǵaı avtojol jobasyna konkýrs ótkiziledi. Jobanyń quny 429 mln dollar. Qyrkúıek aıynda uzaqtyǵy 209 shaqyrym І tehnıkalyq sanattaǵy Tashkent - Shymkent avtojolyn salý jóninde konkýrs ótkiziledi. Jobanyń quny 818 mln dollar. Sonymen birge, uzaqtyǵy 301 shaqyrym Almaty - Qorǵas avtojolyn salý josparlanýda. Jobanyń quny 1 mlrd. 127 mln dollar. Bunyń syrtynda, uzaqtyǵy 69 shaqyrym jáne qozǵalys jıiligi joǵary Úlken Almaty aınalma avtomobıl jolyn (ÚAAAJ) salý josparlanýda. Jobanyń quny 583 mln dollar. Budan tys elimizdiń tuńǵysh avtobany Astana - Býrabaı joly boıynda ıntellektýaldyq kólik júıesin salý kózdelýde. Bul jobanyń quny 137 mln dollar. Keleshekte jańadan uzaqtyǵy 753 shaqyrym Jezqazǵan - Sekseýil temir jolyn salý josparlanýda. Bıznes-delegatsııanyń ókilderi atalǵan jobalardy iske asyrýǵa yntaly ekendikterin bildirdi», delingen baspasóz qyzmetiniń taratqan habarlamasynda.