Portýgalııa 2026 jylǵa arnalǵan ekologııalyq resýrsyn taýysty
ASTANA. KAZINFORM — Portýgalııa 7 mamyrdaǵy jaǵdaı boıynsha bıylǵa tıesili tabıǵı resýrstar qoryn tolyq paıdalanyp qoıdy. Endi el shartty túrde resýrstardy «qaryzǵa» tutyna bastaıdy, dep habarlaıdy Euronews.
Bul eger Jer turǵyndarynyń barlyǵy ortasha portýgalııalyqtar sııaqty ómir súrse, adamzatqa qajetti resýrstardy qamtamasyz etý úshin shamamen úsh planeta qajet bolar edi degendi bildiredi.
Málimetterdi ZERO uıymy Global Footprint Network seriktestigimen jarııalaǵan. Uıym ókilderi byltyr Portýgalııa tabıǵı resýrstaryn 5 mamyrda taýysyp qoıǵanyn eske saldy. Bıyl eldiń ekologııalyq zalaldy azdap jaqsarǵanymen, 7 mamyrdan bastap 2027 jyldyń 1 qańtarynan keıin paıdalanylýy tıis resýrstardy qoldana bastaıdy.
ZERO uıymynyń málimetinshe, Portýgalııa kóptegen jyl boıy óz qajettilikterin qamtamasyz etýge jetetin tabıǵı resýrstar kólemine ıe emes. Ekologııalyq teńgerimsizdikke eldegi óndiris pen tutyný úlgisi sebep bolyp otyr. Ásirese azyq-túlik pen kólik salasy negizgi faktorlar retinde atalǵan.
Uıym Portýgalııanyń ekologııalyq qaryzyn azaıtý úshin:
turaqty aýyl sharýashylyǵyna ınvestıtsııa salýdy;
sý tutynýyn qysqartýdy;
ósimdik tektes azyq óndirisin arttyrýdy;
qashyqtan jumys pen onlaın is-sharalardy kóbeıtýdi;
velosıped pen qoǵamdyq kólik sııaqty ekologııalyq taza transportty damytýdy;
taýarlardy uzaq paıdalanýǵa jáne qaıta óńdeýge múmkindik beretin erejeler engizýdi usyndy.
Sarapshylardyń aıtýynsha, ár azamat ta ekologııalyq zalaldy azaıtýǵa úles qosa alady. Ol úshin janýar aqýyzynyń úlesin qysqartý, ekologııalyq kólik paıdalaný jáne tutyný mádenıetin ózgertý jetkilikti.
Basylym Portýgalııanyń kórsetkishi Eýropalyq odaq elderiniń ortasha deńgeıine jaqyn ekenin atap ótti. Bıyl EO elderi tabıǵı resýrstardyń jyldyq lımıtin orta eseppen 3 mamyrda taýysty.
ZERO uıymynyń dereginshe, EO ishinde ekologııalyq "qaryz kúni" eń erte kelgen el — Lıýksembýrg, onda bul kún 17 aqpanǵa túsken. Al eń sońǵysy Vengrııa bolýy múmkin — 24 maýsym.
Álem boıynsha tabıǵı resýrstaryn eń tez taýystyrǵan el — Katar, onda bul shek 4 aqpanda jetken. Al eń sońǵy kórsetkish Gondýras elinde — 27 qarashaǵa boljanyp otyr.
Aıta ketelik Portýgalııa ishki týrızmge 11 mln eýro ınvestıtsııa salatyny týraly jazǵan edik.
