Port-Saıdtaǵy «fýtbol daýy» órship barady
ASTANA. 4 naýryz. QazAqparat - Mysyrdyń Port-Saıd qalasyndaǵy tártipsizdikten 360 adam zardap shekti. Bul jaıynda Reuters habar taratty.
Habarda aıtylǵandaı, 2012 jyldyń aqpan aıynda bolǵan fýtbol matchyndaǵy tóbeleske qatysqany úshin úkimin kútip jatqan 39 tutqyndy basqa túrmege aýystyrǵan sottyń sheshimine narazylyq bildirgen júzdegen adam sherýge shyqty. Narazy jurt sottan bul sheshimdi ózgertýdi talap etip otyr. Sherýshiler polıtsııa ókilderimen qaqtyǵysyp qaldy. Tártip saqshylary olardy taratý úshin kózden jas aǵyzatyn gazdy qoldanýǵa májbúr boldy.
muslim.kz saıtynyń jazýynsha, qaqtyǵys kezinde quqyqqorǵaý organynyń bir qyzmetkeri qaza tapty. Taǵy bir shendi qyzmetker aıaǵynan jaralandy.
Port Saıd stadıonyndaǵy tóbeles ótken jyldyń aqpan aıynyń 1-i kúni bolǵan edi. Sol kúni jergilikti «ál-Masrı» klýby men kaırlik «ál-Ahlı» komandasynyń oıyny kezinde fýtbol alańyna júgirip shyqqan bir jankúıer astanalyq fýtbolshyny bas-kóz demeı tómpeshtep ala jóneledi. Munyń arty jappaı tóbeleske ulasyp, 73 adam shyǵar esikke japatarmaǵaı umtylǵan jurttyń tabanyna taptalyp óledi. Myńdaǵan adam jaraqat alǵan bolatyn.
Birneshe ondaǵan adam kináli dep tanylady. Olardyń arasynda tóbeles kezinde bir-birine judyryq ala júgirgen jurtty ajyratýdyń, ara túsýdiń ornyna qarap turǵan polıtsııa qyzmetkerleri de bar. Aqpannyń 16-y kúni sot 21 kinálini ólim jazasyna kesken bolatyn. Al naýryzdyń 9-y kúni qalǵan 39 tutqynnyń taǵdyry belgili bolady.
Ólim jazasy Port-Saıdtaǵy tártipsizdikke alyp keldi. Túrmeni basyp almaq bolyp árekettengen tutqyndardyń týystary polıtsııamen qaqtyǵysyp qaldy. Osynyń nátıjesinde 30-ǵa tarta adam qaza taýyp, júzdegen adam jaraqat aldy. Port-Saıdqa áskerdiń bir bóligi kelgennen keıin jaǵdaı qalypqa túskendeı boldy.
