Porschist Magazine jýrnaly elimizdiń týrıstik áleýetin nasıhattaıdy
ASTANA. KAZINFORM — Eýropanyń bedeldi Porschist Magazine jýrnaly Qazaqstan týraly arnaıy shyǵarylym ázirlep jatyr. Bul basylymda elimizdiń kórkem tabıǵaty, sáýlet nysandary men mádenı murasy keńinen tanystyrylady.
Bul týraly «Jibek Joly» telearnasyndaǵy «Búgin LIVE» baǵdarlamasynda «Kazakh Tourism» ulttyq kompanııasynyń Halyqaralyq naryqtar departamentiniń mamany Dinmuhamed Kenjebaev málimdedi.
Jobanyń aıasynda túsirilim toby Almaty, Astana, Túrkistan qalalary men Býrabaı, Sharyn shatqaly sııaqty kórnekti týrıstik oryndardy aralap shyqqan. Arnaıy shyǵarylym 2026 jyldyń naýryz aıynda jaryq kóredi.
— Porschist Magazine jýrnaly Belgııada jaryq kóredi jáne Eýropa aýmaǵynda taratylady. Ideıa jýrnal redaktsııasynan tústi. Olar Qazaqstanǵa kelip, arnaıy shyǵarylym ázirleý nıetin bildirip, Belgııadaǵy Qazaqstan elshiligine júgingen. «Kazakh Tourism» bul bastamany qoldady. Joba elimizdiń halyqaralyq ımıdjin arttyrýda mańyzdy ról atqarady. Túsirilim Almaty jáne Almaty oblysynan bastaldy, keıin Túrkistan qalasynda jalǵasty. Sodan soń Astana men Aqmola oblysynda túsirilim júrgizildi, — dedi spıker.
Onyń aıtýynsha, joba Qazaqstandy jańa qyrynan tanytyp, halyqaralyq aýdıtorııa úshin tyń kókjıekter ashady.
— Biz erekshe áser men erekshe baǵyttardy izdeıtin týrısterge Qazaqstannyń jańa beınesin usynǵymyz keledi. Elimiz tek týrıstik baǵyt qana emes, sonymen qatar shabyt pen tańdanys syılaıtyn el ekenin kórsetkimiz keledi, — dedi ol.
Sondaı-aq ol óz sózinde, Porschist Magazine 2000 jyldan beri shyǵyp kele jatqan bedeldi basylym. Frantsııa, Nıderland, Monako jáne Shveıtsarııa sııaqty memleketterdiń oqyrmanyn qamtıdy. Buǵan deıingi sońǵy arnaıy shyǵarylymdar Úndistan, Aýstralııa, Saýd Arabııasy elderine arnalǵan.
Sonymen qatar Dinmuhamed Kenjebaevtyń aıtýynsha, bıylǵy qyrkúıek aıynda Ulybrıtanııanyń eki jetekshi basylymy — The Telegraph jáne The Times jýrnalısteri Qazaqstanǵa arnaıy saparmen kelip, týrıstik baǵytta materıal ázirleýi josparlanyp otyr.
Eske salaıyq, Qazaqstanda ishki jáne kelý týrızmin damytý maqsatynda bızneske memlekettik qoldaýdyń jeti tetigi qarastyrylǵanyn habarlaǵanbyz.