Porsche tabysy 91,4%-ǵa tómendedi

ASTANA. KAZINFORM – 2025 jyly sportkar óndirýshisi Porsche kompanııasynyń salyq tólengennen keıingi taza paıdasy 310 mln eýro boldy, dep habarlaıdy DW. 

Bul kórsetkish 2024 jylǵy shamamen 3,6 mlrd eýromen salystyrǵanda aıtarlyqtaı az.

Kompanııanyń kirisi de shamamen 10%-ǵa tómendep, 36,3 mlrd eýroǵa deıin qysqardy. Buǵan Qytaı naryǵyndaǵy qıyndyqtar, AQSh baj salyǵyna baılanysty shyǵynnyń artýy jáne ishten janý qozǵaltqyshtarynyń qyzmet etý merzimin uzartý strategııasy áser etti.

Porsche-niń jańa basshysy Michael Leiters modeldik qatardy qaıta qarap, shyǵyndy qysqartý sharalaryn engizýge ýáde berdi. Alaıda bul qadam kúrdeli naryq jaǵdaıy men geosaıası turaqsyzdyq aıasynda júzege aspaq.

Buǵan deıin Volkswagen Group kontserniniń de taza paıdasy 2025 jyldyń qorytyndysy boıynsha shamamen 44%-ǵa tómendep, 12,4 mlrd eýrodan 6,9 mlrd eýroǵa deıin azaıǵany habarlanǵan.

Al kompanııanyń jalpy kirisi ótken jylmen salystyrǵanda aıtarlyqtaı ózgermeı, shamamen 322 mlrd eýro boldy.

Qarjylyq kórsetkishterdiń nasharlaýyna negizgi sebepterdiń biri — onyń enshiles kompanııasy Porsche-niń shyǵyndary. 

Eske salsaq Volkswagen 88 jyldyq tarıhynda alǵash ret Germanııadaǵy zaýytyn jabatynyn jazǵan edik.