Porsche shyǵyndardy azaıtý úshin taǵy 5 myń qyzmetkerin qysqartady
ASTANA. KAZINFORM — Germanııanyń Porsche avtokontserni «bolashaqqa arnalǵan sharalar paketi» aıasynda taǵy 5 myń jumys ornyn qysqartatynyn málimdedi. Bul týraly DW jazdy.
Qysqartý sharalary kompanııanyń Shtýtgart-Tsýffenhaýzendegi negizgi zaýyty men oǵan jaqyn ornalasqan Vaısahtaǵy ǵylymı-zertteý ortalyǵyn qamtıdy. Qysqartý jumystary 2035 jylǵa deıin kezeń-kezeńimen júzege asyrylady. Óz kezeginde kompanııa osy merzimniń sońyna deıin óńirdegi óndiristik alańdardyń jumysyn jalǵastyrýǵa kepildik berip otyr.
Porsche basshylyǵynyń málimdeýinshe, bul kezeńde qyzmetkerlerdi májbúrli túrde jumystan shyǵarý bolmaıdy.
Kompanııanyń habarlaýynsha, jumys oryndaryn qysqartý áleýmettik jaýapkershilik qaǵıdattaryna saı júrgiziledi. ıAǵnı qyzmetkerlerdiń tabıǵı aýysýy, zeınetke shyǵýy jáne erikti túrde jumystan ketý týraly kelisimder arqyly júzege aspaq.
Porsche ókilderiniń aıtýynsha, bul sharalardyń maqsaty — kompanııanyń básekege qabilettiligin arttyra otyryp, uzaq merzimde múmkindiginshe kóp jumys ornyn saqtap qalý. Buǵan deıingi qysqartý kezeńi 2025 jyly ótken bolatyn. Jalpy alǵanda, kompanııa Shtýtgart óńirindegi jumys oryndarynyń úshten birinen astamyn qysqartpaq.
Qyzmetkerler sanyn azaıtýmen qatar, Porsche 2,1 mıllıard eýro kólemindegi ınvestıtsııany qaıta bólýdi josparlap otyr. Sondaı-aq Rojdestvo merekesine beriletin syıaqylar qysqarady, qyzmetkerlerdiń bonýstary kompanııa qyzmetiniń nátıjelerine tikeleı baılanysty bolady.
Budan bólek, qashyqtan jumys isteý múmkindigi aıyna 12 kúnnen 8 kúnge deıin qysqartylady. Al qyzmetkerler men basshylyqtyń eleýli bóliginiń jalaqysy burynǵydaı qarqynmen emes, shekteýli kólemde ósetin bolady.
Mundaı sheshimder kompanııadaǵy uzaqqa sozylǵan qarjylyq qıyndyqtar aıasynda qabyldandy. 2025 jyly Porsche kontserniniń taza paıdasy 91 paıyzǵa tómendep, 310 mıllıon eýrony ǵana qurady. Bul úrdis 2026 jyldyń birinshi toqsanynda da jalǵasqanymen, quldyraý qarqyny birshama baıaýlaǵan.
Aıta keteıik, buǵan deıin Porsche kompanııasynyń tabysy tómendegenin jazdyq.
