Porsche aktsııalary kúrt tómendedi

ASTANA. KAZINFORM — Búgin Porsche kompanııasynyń aktsııalary 7,5%-ǵa quldyrdady, sebebi avtokólik óndirýshi elektromobıl óndirisin azaıtyp, suranystyń tómen bolýyna baılanysty strategııasyn qaıta qarap, bolashaq boljamdaryn da tómendetti, dep jazdy Azertadj.

Juma kúni Porsche keıbir tolyǵymen elektrli modelderdiń shyǵarylymyn keıinge qaldyrǵanyn málimdedi. Bul — kompanııanyń qıyndyqtarǵa tap bolǵanynyń taǵy bir dáleli.

Ekinshi toqsandaǵy paıda aıtarlyqtaı tómendedi, oǵan Qytaıdaǵy negizgi naryqtaǵy qysym men AQSh-taǵy salyqtardyń kóterilýi áser etken.

Kompanııanyń aıtýynsha, strategııany qaıta qaraý nátıjesinde bıylǵy operatsııalyq paıda 1,8 mlrd eýroǵa deıin tómendeıdi. Sonymen qatar, 2025 jylǵa josparlanǵan rentabeldik (tabystylyq) 2%-dan aspaıdy, al bul buryn boljaǵan 5–7% aralyǵynan áldeqaıda tómen.

Keıbir sarapshylar bul boljamnyń qysqarýyn elektromobılderge suranystyń álsizdigi jáne ishten janatyn qozǵaltqyshtardyń qoldaný merzimin uzartýǵa qajettilik aıasynda bolýy zańdy dep otyr.

Eýropadaǵy eń iri avtokontsern Volkswagen (Porsche-tiń 75,4%-yna ıelik etedi) bul qaıta qurylymdaýǵa baılanysty 5,1 mlrd eýro joǵaltatynyn málimdedi.

Sonymen qatar, Volkswagen paıda marjasyna (rentabeldikke) qatysty boljamyn 4–5%-dan 2–3%-ǵa deıin tómendetti.

Porsche de salyqtan keıingi paıda boıynsha óz boljamyn qysqartty.

Jefferies analıtıkteriniń aıtýynsha, bul — Porsche-tiń bıylǵy úshinshi ret boljamdy tómendetýi, ári sońǵysy bolýy múmkin.

Eske sala keteıik, buǵan deıin Volkswagen kompanııasynyń kirisi 64% tómendep, Qytaıdaǵy zaýytyn jabatyny habarlanǵan edi.