Pornografııa jáne sýıtsıdti nasıhattaý: onlaın-platformalarda 6 myńnan astam quqyq buzýshylyq anyqtaldy
ASTANA. KAZINFORM – QR Premer-mınıstriniń orynbasary — Mádenıet jáne aqparat mınıstri Aıda Balaeva QR Parlamenti Májilisi depýtattarynyń 18 maýsymdaǵy depýtattyq saýalyna bergen jaýabynda elimizde balalar psıhologııasyna keri áser etetin kontentti shekteý boıynsha qandaı jumystar atqarylyp jatqanyn málimdedi.
Onyń sózinshe, halyqaralyq tájirıbeni eskere otyryp, onlaın-oıyndardaǵy balalar qaýipsizdigin kúsheıtý boıynsha onlaın-platformalarmen konsýltatsııalar júrgizilip jatyr.
– 2026 jyldyń basynan beri onlaın-platformalarda onlaın-kazıno qyzmeti (13 806), esirtki quraldaryn nasıhattaý (7 448), pornografııany taratý (6 034), sýıtsıdti nasıhattaý (172), kámeletke tolmaǵandarǵa zııan keltiretin aqparatty ornalastyrý (119), zorlyq-zombylyq kýlti faktileri boıynsha 27 631 quqyq buzýshylyq anyqtaldy. «Instagram» – 9 532, «VKontakte» – 8 503, «Telegram» – 3 018, «YouTube» – 3 340, «TikTok» – 2 820, «Facebook» – 269, «Moı mır» – 63, «X» – 41, «Odnoklassnıkı» – 25, «Threads» platformasynda – 20 quqyq buzýshylyq anyqtaldy, – delingen qujatta.
Sonymen qatar Aıda Balaevanyń málimdeýinshe, qazirgi ýaqytta onlaın-platformalar ata-analarǵa jasóspirimderdiń ınternetti paıdalaný ýaqytyn shekteý boıynsha fýnktsıonaldyq múmkindikter usynady.
– Áleýmettik jeliler men onlaın-oıyndarda jas erekshelikterine baılanysty shekteýler engizilgen, sondaı-aq kámeletke tolmaǵandardyń gadjet paıdalaný ýaqytyn baqylaý quraldary qoljetimdi. Máselen «TikTok» onlaın-platformasynyń ishki erejelerine sáıkes, platformany tek 13 jastan asqan paıdalanýshylar qoldana alady, al keıbir fýnktsııalar kámeletke tolmaǵandar úshin qoljetimsiz, – deıdi ol jaýabynda.
Mádenıet jáne aqparat mınıstriniń sózinshe, balalar psıhologııasyna zııandy kontentterdi óshirý boıynsha jumystar jalǵasady.
– Budan bólek, aldaǵy ýaqytta Mádenıet jáne aqparat mınıstrligi onlaın-platformalar ákimshilikterimen birlesip, zańǵa qaıshy materıaldardy joıý jáne zańnamaǵa qaıshy keletin ári balalardyń quqyqtary men múddelerin buzatyn aqparattyń taralýyna jol bermeýge baǵyttalǵan quqyqtyq normalardy engizý jumystaryn ýákiletti organdarmen birlese otyryp jalǵastyratyn bolady, – deıdi ol.
Aıta keteıik, buǵan deıin ınternettegi tanystyq balaǵa qandaı qaýip tóndirýi múmkin ekenin jazǵanbyz.
