Popýlısterdiń deregine súıenip, kez kelgen ekonomıka salasyn «parazıt» deýge bolmaıdy — Sklıar

ASTANA. KAZINFORM — Elimizdiń mashına jasaý salasy bıýdjetten qandaı da bir dotatsııa almaıdy. Bul týraly Premer-mınıstrdiń birinshi orynbasary Roman Sklıar aıtty. 

Úkimet úıinde ótip jatqan baspasóz máslıhatynda BAQ ókilderi Roman Sklıardan «Qazaqstanda avtomobıl óndirisi damyp, zaýyttar salynyp jatyr degen qaǵaz júzinde bar. Biraq, kózge kórinetin damý baıqalmaıdy. Nege? Siz osy salanyń jaýapty mamany retinde janyńyz ashı ma?» dep suraǵan edi. Saýalǵa jaýap bergen birinshi vıtse-premer keıbir popýlısterdiń derekterine súıene otyryp, elimizdiń ekonomıkasynyń kez kelgen salasyn «parazıt», «jaman jumys isteıdi», «kásiporyndaryn joıyp, naryqtan ketýi tıis» deýge bolmaıtyndyǵyn basa aıtty.

— Álemniń kez kelgen ekonomıkasy, ózin-ózi qurmetteıtin elder halyq ekonomıkasynyń kez kelgen salasyn, tipti ol aýyl sharýashylyǵy, kólik, metallýrgııa, mashına jasaý bolsa da belgili bir deńgeıde qoldaý kórsetedi. Muny damyǵan elder úlgisinen de kórip otyrmyz. Mundaı qoldaý mashına jasaý salasyna tikeleı bıýdjet qarjysyn quıýǵa da oıysyp jatady. Bul kásiporyn jumys isteýi úshin jasalady. Avtoónerkásipke keler bolsaq, bul qarqyndy damyp jatqan basqa da ónerkásip salalarynyń biri. Erekshe atap ótkim kelerligi, ol keıbir salalar sııaqty bıýdjetten qandaı da bir dotatsııa almaıdy. Olar ózderiniń kásiporyndarynda erkin saýda aımaǵynda jumys isteıdi. Olar ónim shyǵarady, — dedi ol.

Birinshi vıtse-premer osy oraıda ýtılalym máselesin qozǵady.

— Saıasılandyryp jibergen ýtılalym degenimiz ne? Bul — janama salyq qana. Ol avtoqurastyrýshylarǵa ketpeıdi, memlekettik «Jasyl damý» AQ-qa túsedi jáne ekologııalyq qajettilikke jumsalady. Eger ýtılalym bolmaǵanda, onda bul shyǵyndardy respýblıkalyq jáne jergilikti bıýdjetterdiń esebinen óteıtin edik. Demek, bul janama salyq bıýdjet shyǵyndaryn ótep otyr. Bul anyq, — dedi Roman Sklıar.

Sonymen qatar Almaty men Qostanaıda bıyl avtomobıl qurastyratyn eki zaýyt qurylysy aıaqtalatyndyǵyn aıtty. Onyń atap ótýinshe, mashına jasaý salasyna quıylǵan ınvestıtsııa úlken mýltıplıkatıvti áser beredi.

— Sarapshylardyń baǵalaýynsha, mashına jasaý salasynda 1 jumys ornyn qurý janama salalarda keminde 3 jańa jumys oryndaryn ashady. Muny da túsinýimiz qajet, — dedi Úkimet basshysynyń birinshi orynbasary.

Aıta ketelik Premer-mınıstrdiń birinshi orynbasary Roman Sklıar Úkimet úıindegi baspasóz máslıhatynda Salyq kodeksi baspana baǵasyn 20 paıyzǵa kóteretini týraly boljamǵa jaýap bergen edi.