Ponomarev etnomádenı birlestikterdiń bir palataly Parlamenttegi orny týraly pikir bildirdi

QYZYLORDA. KAZINFORM – Qazaqstandaǵy orys, slavıan jáne kazak uıymdary qaýymdastyǵynyń tóraǵasy, Májilis depýtaty Sergeı Ponomarev V Ulttyq quryltaıda sóz alyp, etnomádenı birlestikterdiń saıası protsesterge aralasý múmkindigi týraly oı qozǵady.

Sergeı Ponomarev sózin áriden bastap, bir palataly Parlament qurýǵa daıyndyq tıisti deńgeıde júrip jatqanyn atap ótti.

- Biz azamattardyń usynystary negizinde bir palataly Parlamenttiń keleshegin, ony qalyptastyrý men ókilettikterdiń negizgi tásilderin ázirledik. Talqylanǵan máselelerdiń biri prezıdenttik kvota týraly boldy. Onyń ishinde etnomádenı birlestikterdiń ókildigi de bar. Jumys tobynyń músheleri Memleket basshysynyń prezıdenttik kvotany joıý týraly sheshimin qoldady. Bul durys tásil. Óıtkeni barlyq depýtat bir tártippen saılaný kerek. Bul ádildik prıntsıpine saı keledi, - dedi ol.

Májilis depýtaty bul sheshim etnomádenı birlestikterdiń ókilderin mańyzdy memlekettik sheshimder qabyldanatyn basqa salalardan alystatpaý kerek degen oı aıtty.

- Biraq men qozǵaǵym kelgen máseleniń biri etnomádenı birlestikterdiń Parlamenttegi ókildigi, negizgi memlekettik sheshimderdi qabyldaýǵa qatysýy týraly bolyp otyr. Bul tek slavıandar týraly ǵana emes. Bul másele parlament reformasynan tys. Biraq ár túrli ult ókilderi úshin ázirge bul másele ashyq kúıinde qalyp otyr, - dedi Sergeı Ponomarev.

Aıta keteıik, Kazinform Memleket basshysynyń Ulttyq quryltaıdaǵy sózin translıatsııalaıdy.