Polıak tennısshisi alǵash ret US Open týrnıriniń jeńimpazy atandy
NUR-SULTAN. QazAqparat - Polıak tennısshisi Iga Sventek AQSh ashyq chempıonatynyń jeńimpazy atandy, dep habarlaıdy QazAqparat tilshisi.
Álemniń 1-raketkasy I.Sventek fınalda dúnıejúzilik reıtıngte 5-satyda turǵan týnıstik Ons Jabermen bas júldeni sarapqa saldy.
Iga 1 saǵat 45 mınýtqa sozylǵan kezdesýde 6:2, 7:6 (7:5) esebimen jeńiske jetti.
Osylaısha, buǵan deıin Rolan Garros jarysynyń eki márte jeńimpazy atanǵan I.Sventek úshinshi ret «Úlken dýlyǵa» týrnırin utty. Ol qatarynan onynshy fınalynda eshkimge des bermedi.
I.Sventek AQSh ashyq chempıonatynda úzdik shyǵýy nátıjesinde 2,6 mln AQSh dollary kóleminde tabys taýyp, 2 myń reıtıngilik upaıǵa ıe boldy.
Osy dodada 1,3 mln dollarǵa qosa 1300 upaıǵa qol jetkizgen O.Jaber dúısenbide jańartylatyn álemdik reıtıngide 2-orynǵa kóteriledi. Ol qatarynan ekinshi fınalda jeńilip qaldy. Ons Jaber Ýımbldon týrnıriniń fınalynda qazaqstandyq Elena Rybakınaǵa jol bergen edi.
AQSh ashyq chempıonatynda erler arasynda fınalda norvegııalyq Kasper Rýýd pen ıspanııalyq, 19 jastaǵy Karlos Alkaras kortqa shyǵady.
Eske sala keteıik, budan buryn Qazaqstan tennıs quramasynyń Devıs kýbogyna daıyndyqty bastaǵanyn jazǵan bolatynbyz .
Foto: drmichellecleere.com
