Poltoranınniń bapkeri málimdeme jasady
ASTANA. QazAqparat - Alekseı Poltoranınniń alǵashqy bapkeri Alekseı Nakonechnyı resmı málimdeme jasap, otandastaryn sportshyny qoldaýǵa shaqyrdy, dep habarlaıdy QazAqparat «SPORTINFORM» SAA-ǵa silteme jasap.
«Meniń shákirtim jol bergen antıdopıngti erejelerdiń buzylýyna baılanysty barlyqtaryńyzdan keshirim suraımyn. Keshirim suraı otyryp, búkil el turǵyndarynyń, ata-analar men basshylyqtyń aldynda basymdy ıemin. 11 jyl boıy Alekseıdiń aldyna bir ǵana maqsat qoıyp, eń iri saıystarda el úshin «altyn» utýdy mindettegendikten, bolǵan oqıǵaǵa ózimdi kinálilerdiń biri dep sanaımyn. «Altynǵa» degen umtylys ruqsat etilmeıtin áreketke ákeldi. Alekseıdi tek ádil ári tártipti adam dep bilemin. Ol birinshi ret aıaǵyn shalys basyp, tyıym salynǵan ádisti qoldanýǵa bel sheshkenimen, aqyrynda qabyldamady dep senemin», - deıdi sportshynyń bapkeri.
Alekseı Nakonechnyı óz sózinde VADA-nyń oń sheshimin kútip otyrǵanyn da jasyrmady.
«Barlyqtaryńyz Alekseıdi qoldańyzdarshy, ótinemin. Oǵan sportqa qaıtyp kelýin, bizdiń eldiń namysyn eń joǵary deńgeıde ary qaraı qorǵaı berýin, tek adal sportty nasıhattap, dopıngke qarsy kúreske qatysa berýin tileımin», - dedi Nakonechnyı.
Budan buryn habarlanǵandaı, Avstrııanyń Zeefelde qalasynda shańǵy jarysynan uıymdastyrylǵan álem chempıonatynda Qazaqstan, Avstrııa men Estonııa sportshylary antıdopıngtik erejelerdi buzdy degen kúdikke ilingeni habarlanǵan edi. Estonııalyq sportshylar Karel Tammıarv men Andreas Veerpalý, sondaı-aq Qazaqstan ókili Alekseı Poltoranın Halyqaralyq shańǵy sporty túrleri federatsııasynan shettetildi.
Sondaı-aq bul oqıǵaǵa qatysty QR SІM orynbasary Erjan Ashyqbaev túsinik bergen bolatyn. Ol Qazaqstan «ádil sport» qaǵıdatyn ustanatynyn atap ótti. «Dopıngpen kúres, sportshylarmen ashyq dıalog sekildi ustanymǵa árqashan da mán berip kelemiz. Biz taza sportqa, sondaı-aq bizdiń barlyq sportshylar úshin birdeı jaǵdaı jasaýǵa ekpin qoıýdamyz. Qazaqstan ıÝNESKO-nyń tıisti konventsııasyna qosyldy jáne barlyq osy standarttar pysyqtalýda», - dedi E. Ashyqbaev.
