Polshadaǵy prezıdent saılaýy: tartys endi ǵana bastaldy
ASTANA.KAZINFORM — Ótken demalys kúnderi Polshada prezıdent saılaýynyń alǵashqy kezeńi aıaqtaldy. Onda alǵashqy eki oryndy «Azamattyq platforma» partııasynyń kandıdaty Rafal Tshaskovskıı men «Quqyq jáne ádilet» partııasynyń atynan saılaýǵa túsken Karol Navrotskıı ıelendi, dep jazdy Kazinform agenttiginiń menshikti tilshisi.
«Azamattyq platforma» ókili Rafal Tshaskovskıı 31,36% daýys jınasa, popýlıstik ońshyl «Quqyq jáne ádilet» partııasynyń qoldaýyna ıe bolǵan Karol Navrotskıı 29,54% daýysqa ıe boldy.
Endi eki kandıdat 2025 jyldyń 1 maýsymynda ótetin ekinshi týrda baq synaıdy. Eger Tshaskovskıı jeńiske jetse, bul úkimet basshysy Donald Týsktiń el ishindegi pozıtsııasyn kúsheıtýge kómektesedi. Al eger Navrotskıı jeńse, Polshada eldiń eki iri saıası partııasy arasyndaǵy teketires jalǵasýy múmkin.
Batys basylymdarynyń jazýynsha, alǵashqy týrdyń nátıjesi boıynsha Týskke qarsy shyqqan partııalar onyń jaqtastaryna qaraǵanda jaqsy nátıje kórsetti. Bul jaǵdaı Tshaskovskıı úshin qıyndyq týǵyzýy múmkin.
— Tshaskovskııdiń basymdyǵy saýalnama nátıjelerinde boljaǵannan az boldy, bul Navrotskııge ekinshi týrǵa senimdi ótýge múmkindik berdi, — dep jazady POLITICO.
— Segiz aı buryn men bul jarys óte tartysty bolady degen edim, shynymen de solaı bolyp otyr, — dedi Tshaskovskıı jeksenbi kúni keshki mıtıng kezinde.
— Bul nátıje bizge prezıdenttik saılaýda jeńiske jetý úshin qanshalyqty kúshti ári tabandy bolýymyz kerektigin kórsetip otyr. Biz márege jaqyndadyq. Biz jeńemiz! — dep qosty ol.
Óz kezeginde, Navrotskıı óz jaqtastaryna «úgit-nasıhat, jalǵan aqparat pen ótirikke qarsy turyp, Donald Týsk basqaratyn memlekettik qurylymdardyń yqpalyna kónbegeni» úshin alǵys aıtty.
Varshavadaǵy Stefan Vyshınskıı atyndaǵy ýnıversıtettiń saıasattanýshysy Bartosh Rydlınskııdiń aıtýynsha, endi Varshava meri (Tshaskovskıı) elektoratty keńeıtý úshin burynǵydan da aýqymdy qoldaý izdeýge májbúr bolady.
— Biz Navrotskııden basqa kandıdattarǵa daýys bergen saılaýshylar úshin túrli, keıde qarama-qaıshy sıgnaldardy kóretin bolamyz, — dedi B. Rydlınskıı European Newspaper basylymyna.
Kelesi kezeńde tartys birinshi týrda basqa kandıdattarǵa daýys bergen saılaýshylar úshin bolatyny kútiledi. Tshaskovskıı orta jáne solshyl baǵyttaǵy úmitkerlerdiń jaqtastarynan qoldaý izdese, Navrotskıı úshinshi oryn alǵan ýltraońshyl kandıdat Slavomır Mentsenniń (14,8% daýys) elektoratyna úmit artady.
— Men Slavomır Mentsenge úndeý joldaǵym keledi. Qazir — Polshany qutqaratyn sát. Biz ekeýimiz de egemen, kúshti, baı jáne qaýipsiz Polshaǵa umtylamyz, — dedi Navrotskıı daýys berý aıaqtalǵan soń sóılegen sózinde.
Parlament spıkeri Shımon Holovnıa «Polsha 2050» ońshyl-ortalyq partııasynan saılaýǵa qatysyp, 4,99% daýys jınady. Solshyl baǵyttaǵy Magdalena Beıat 4,23% daýysqa ıe boldy. Bul eki partııa da Donald Týsk basqaratyn bıleýshi koalıtsııa quramyna kiredi. Saılaý aldyndaǵy naýqanda olar Tshaskovskııge qarsy syn aıtýdan aýlaq boldy.
— Endi Tshaskovskıı, bálkim, Shımon Holovnıa men Magdalena Beıat sekildi kandıdattarǵa dostyq nıet tanytatyn sıgnaldar joldaýy múmkin, — dedi sarapshy.
Jalpy alǵanda, Týskke qarsy shyqqan kandıdattar úkimetti qoldaǵan úmitkerlerden jaqsy nátıje kórsetti. Bul — Tshaskovskıı úshin 1 maýsymda ótetin ekinshi týrda jeńiske jetýdi qıyndatatyn faktor.
— Bul endi naǵyz sheshýshi sát. Árbir daýys úshin kúres bastalady. Aldaǵy eki apta — elimizdiń bolashaǵyn aıqyndaıtyn kezeń. Sondyqtan artqa sheginýge bolmaıdy, — dep jazdy premer-mınıstr Donald Týsk áleýmettik jelidegi paraqshasynda.
Aıta keteıik, Polshada prezıdent saılaýynyń ekinshi kezeńi 2025 jyldyń 1 maýsymynda ótedi.
Polshada sońǵy onjyldyqtaǵy eń joǵary qatysý tirkeldi.