Polshada iri munaı ken orny tabyldy

ASTANA. KAZINFORM —  Kanadalyq energetıkalyq kompanııa Baltyq teńizinde iri kómirsýtek qory bar ken ornyn anyqtady. Bul týraly Kazinform agenttiginiń tilshisi TVP World arnasyna silteme jasaı otyryp habarlady. 

Kanadanyń Central European Petroleum (CEP) kompanııasy Polshadaǵy Svınoýıstse portty qalasynyń mańynda, Baltyq teńiziniń soltústik-batys jaǵalaýynda iri munaı jáne gaz ken ornyn tapty.

Kompanııa Wolin East 1 (WE1) burǵylaý uńǵymasynda 22 mıllıon tonna munaı jáne 5 mıllıard tekshe metr gaz bar dep baǵalanyp otyrǵan ken ornyn ashqanyn jarııalady.

Aldyn ala málimetter boıynsha, jalpy qor 33 mıllıon tonna munaı men 27 mıllıard tekshe metr gazdy quraýy múmkin.

Polsha aqparat agenttiginiń (PAP) habarlaýynsha, bul — sońǵy onjyldyqta Eýropada ashylǵan eń iri dástúrli munaı ken oryndarynyń biri bolyp tabylady.

CEP kompanııasynyń bas dırektory Rolf G. Skaar baspasóz habarlamasynda:

— Bul — Central European Petroleum kompanııasy men jalpy polshalyq energetıka sektory úshin tarıhı sát, — dep málimdedi.

Wolin lıtsenzııalyq aýmaǵy 593 sharshy shaqyrymdy qamtıdy.

Aıta keteıik, buǵan deıin Qytaıdyń ulttyq teńiz munaı korporatsııasy (CNOOC) Ońtústik Qytaı teńiziniń shyǵys bóliginde 100 mıllıon tonnadan astam dáleldengen munaı qoryna ıe iri ken orny tabylǵanyn habarlaǵan bolatyn.

Eske sala keteıik, buǵan deıin Túrkııadaǵy Qara teńizden jańa gaz ken orny tabylǵanyn jazǵan edik.