Polshada premer-mınıstrge shabýyl jasamaq bolǵan kúdikti ustaldy
ASTANA. KAZINFORM – Polsha polıtsııasy el premer-mınıstri Donald Týskke shabýyl jasaýdy josparlady degen kúdikpen bir adamdy ustady, dep habarlaıdy BBC.
Jeksenbi kúni tańerteń quqyq qorǵaý organdary Donald Týsk pen Polsha qorǵanys mınıstri Vladıslav Kosınıak-Kamyshqa shabýyl jasalý qaýpi bar ekenin málimdegen.
Keıin Polsha ishki ister mınıstri Martsın Kervınskıı kúdiktiniń ustalǵanyn X áleýmettik jelisindegi paraqshasynda rastady.
– Premer-mınıstr Donald Týskke qoqan-loqy kórsetip, oǵan shabýyl jasaýdy josparlaǵan er adamdy Polsha polıtsııasy ustady, – dep jazdy mınıstr.
Alaıda ol kúdiktiniń jeke basy, shabýyldyń qalaı josparlanǵany jáne ony ustaý operatsııasy týraly qosymsha málimet jarııalamady.
Donald Týsk te X jelisinde polıtsııa qyzmetkerlerine jedel ári batyl áreket etkeni úshin alǵys aıtty.
Bul oqıǵa Polshada quqyq qorǵaý organdary kúsheıtilgen rejımde jumys istep jatqan tusta boldy. Sońǵy kúnderi eldegi bilim berý mekemelerinde sýyq qarýmen jasalǵan úsh bólek shabýyl tirkelgen.
Sársenbi kúni eldiń ortalyq bóligindegi Mazovetsk voevodstvosynda 19 jastaǵy oqýshy mektep synybynda toǵyz oqýshy men bir muǵalimdi ótkir zatpen jaralaǵan.
Kelesi kúni osy óńirdegi taǵy bir mektepte 15 jastaǵy jasóspirim sharýashylyq qyzmetkerin pyshaqtap óltirgen. Tergeý málimetinshe, ol shabýyl sátin dýlyǵasyna bekitilgen kameraǵa túsirgen.
Al senbi kúni eresekterge arnalǵan bilim berý ortalyǵynda 21 jastaǵy er adam úsh adamdy jaralaǵan.
Ázirge Polsha bıligi bul úsh shabýyldyń ózara baılanysy bar-joǵyn anyqtaǵan joq.
Aıta keteıik, buǵan deıin Túrkııanyń Ystanbul qalasyndaǵy mektepterdiń birinde oqýshy qyz pyshaqpen shabýyl jasap, segiz adamdy jaralaǵan bolatyn.
