Polshada neke qujattaryndaǵy «kúıeýi» jáne «áıeli» degen sózder bolmaıdy

ASTANA. KAZINFORM – Polshada resmı neke qujattaryndaǵy «kúıeýi» jáne «áıeli» termınderi «birinshi jubaıy» jáne «ekinshi jubaıy» degen sózdermen aýystyrylady, dep habarlaıdy TASS aqparat agenttigi.

Bul týraly eldiń Tsıfrlandyrý mınıstrligi habarlady.

Vedomstvo saıtynda tıisti ereje ázirlenip jatqany atap ótilgen. Sheshim Varshavany Eýropa odaǵynyń basqa elderinde qıylǵan bir jynysty nekelerdi tanýǵa mindetteıtin EO sotynyń sheshimin oryndaý qajettiligimen baılanysty dep túsindiriledi.

- Usynylǵan ózgerister «birinshi jubaıy» jáne «ekinshi jubaıy» genderlik beıtarap belgilerin paıdalanýdy kózdeıdi, - delingen málimdemede.

Buǵan deıin, 2025 jyldyń 25 qarashasynda Eýroodaq soty Polshanyń eki azamatyna qatysty is boıynsha sheshim shyǵardy, oǵan sáıkes Polsha bıligi shetelde qıylǵan bir jynysty nekelerdi tanýy tıis. Búginde Polsha zańy mundaı odaqtardy tanymaıdy, al konstıtýtsııada neke tek erkek pen áıeldiń odaǵy retinde anyqtalady.

Buǵan deıin sot EO-nyń barlyq elderine bir jynysty nekeni tanýdy buıyrǵanyn jazǵan edik.

Búginde EO-ǵa múshe 27 memlekettiń jartysynan kóbi bir jynysty nekeni moıyndap otyr. Nıderland 2001 jyly buny jasaǵan álemdegi alǵashqy el bolyp tarıhqa endi.